مووچەی مامۆستایانی گرێبەستی زانکۆ و پەیمانگەکان دابەش دەکرێت

ئاڤا نیوز 

 

بە بڕیاری وەزیری خوێندنی باڵا و توێژینەوەی زانستی یەکە ژمێریارییەکانی زانکۆ و پەیمانگە حکومییەکان ئاگادارکراونەتەوە، بۆ ئەوەی لە مانگی 11ـەوە مووچەی مامۆستایانی گرێبەست دابەش بکرێت، بەڵام تەنیا لە یەک زانکۆ مامۆستایان مووچەکانیان وەرگرتووە.

 

وێنە گەورەکە: مووچەی مانگی 11ـی مووچەخۆرانی هەرێمی کوردستان دابەش کراوە، بەهۆی دواکەوتنی زانکۆ و پەیمانگەکان لە تەواوکردنی ڕێکارەکان، بەشێکی زۆری مامۆستایانی گرێبەست لە وەرگرتنی یەکەم مووچەیان بێبەش بوون، تەنیا لە زانکۆی گەرمیان شایستە داراییەکان خەرج کراوە.

 

زانیاریی تایبەت: بە گوێرەی پەیامێکی د. ئارام محەممەد، وەزیری خوێندنی باڵا و توێژینەوەی زانستی کە دەست ئاڤا کەوتووە، ئاماژە بەوە دراوە کە پێویستە لەسەر یەکەی ژمێریاری سەرجەم زانکۆکان ئەو مامۆستایانەی گرێبەستیان بۆ کراوە لە مانگی 11ـەوە مووچەکانیان ببەسترێت و ناوەکانیان ڕەوانەی خەزێنەکان بکرێت، تاوەکو شایستە داراییەکانیان خەرج بکرێت.

 

زانیاریی بەدەستهاتوو: بەگوێرەی بەدواداچوونی ئاڤا مامۆستایانی گرێبەست لە زانکۆی گەرمیان و زانکۆی پۆلیتەکنیکی گەرمیان شایستە داراییەکانی مانگی 11 و چوار ڕۆژی مانگی 10ـیان بۆ خەرج کراوە.