بیرەکانی ئاوی خواردنەوە بە ئەلیکترۆنی دەکرێن

ئاڤا نیوز

 

بە سیستمێکی زیرەک کە لەڕێگەی مۆبایل و ئەپلیکەیشنێکەوە کار دەکات، کارکردنی بیرەکانی ئاوی خواردنەوە کۆنتڕۆڵ دەکرێت و دەکرێتە ئەلیکترۆنی.

 

وێنە گەورەکە: زیاتر لە پێنج هەزار و 400 بیری ئاوی خواردنەوە لە هەرێمی کوردستان هەیە، بۆ یەكەمجار لەسەر ئاستی عێراق سیستمێكی ئەلیكترۆنی پێشکەتوو کە دەتوانێت تەواوی داتاکانی پەیوەیست بە بیرەکانی ئاو بخوێنێتەوە، جێبەجێ دەکرێت و لە ئەگەری سەرکەوتنی پرۆژەکەش لە تەواوی ناوچەکان جێبەجێ دەکرێت.

 

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی وەزارەتی شارەوانی و گەشتوگوزار بە ئاڤا میدیای راگەیاند: لەڕێگەی سیستمەکەوە دەتوانرێت کۆنتڕۆڵی تەواوی بیرەکان بکرێت، تەنانەت دەتوانرێت نامەی دەنگی بنێردرێتە نێو بیرەکە و چاودێری چڕیش بکرێت، هاوکات کاتژمێرەکانی کارکردنی بیرەکە، ڕێژەی دەرهێنانی ئاو، ڕێژەی کلۆر، کارپێکردن و کوژاندنەوەی بیرەکە ئاشکرا دەکات.

 

زانیاریی زیاتر: یەکێکی دیکە لە سوودەکانی ئەو سیستمە ئەوەیە: بەرهەمهێنانی ئاوی بیرەکەت پێ دەڵێت لە ماوەی ڕابردوو، هاوکات لە ئەگەری دابەزینی ئاستی ئاوی بیرەکە، ئاگاری دەدات لەوەی بەرهەمهێنانی ئاو کەم دەبێتەوە و پێویستە بۆری زیاتر بخرێتە نێو زەوییەوە تاوەکو بتوانێت ئاو ڕابکێشێت.

 

ئەوەی پێوستە بیزانیت: لە قۆناغی یەکەمدا و وەک هەڵسەنگاندن، سیستمەکە بۆ 14 بیری ئاوی خواردنەوە لە سنووری بەڕێوەبەرایەتییەکانی ئاوی هەولێر، سۆران و كۆیە جێبەجێ كراوە.