ناردنی لیستی مووچەی مانگی یەک پێویستی بەڕێککەوتنی سیاسییە

ئاڤا نیوز

 

16 ڕۆژ لە مانگی یەکی ساڵی نوێ تێپەڕدەبێت، هێشتا وەزارەتی دارایی فیدڕاڵی تەواوکاری مووچەی مانگی 12ـی بۆ هەرێمی کوردستان خەرجنەکردووە. لیستی مووچەی مانگی یەک بە شێوازی نوێ ئامادەکراوە و پێش ناردنی چاوەڕێی ڕێککەوتنێکی نوێی سیاسیی نێوان هەولێر و بەغدایە.

 

چیرۆکی سەرەکی: حکومەتی فیدڕاڵی نیازێکی بۆ خەرجکردنی مووچەی مانگی 12ی ساڵی ڕابردوو نییە، وەزارەتی دارایی و ئابووری هەرێمی کوردستانیش چەند ڕۆژێکە داتاکانی ساڵی ڕابردوو بڵاودەکاتەوە کە بڕی کەمتر لە بڕی تەرخانکراوی بۆ هاتووە و چاوەڕێی تەواوکاری پارەکە بۆ مانگی 12 دەکات.

 

زانیاریی بەدەستهاتوو: یەکلاییکردنەوەی کێشەکانی نێوان هەولێر و بەغدا، حکومەتی هەرێمی کوردستانی بە ڕژدی هێناوەتە سەرهێڵ و بڕیارە هەفتەی داهاتوو زنجیرەیەک کۆبوونەوە و دانوستاندن بۆ یەکلاییکردنەوەی پرسەکان لە نێوان هەردوولا ئەنجام بدرێن بۆ گەیشتن بە خاڵی ئەرێنی و  ڕێککەوتنی سیاسیی لەسەر کۆی پرسەکان.

 

زانیاریی تایبەت: بەگوێرەی بەدواداچوونی ئاڤا، وەزارەتی دارایی و ئابووری وردبینی لە لیستی مووچەی مانگی یەکی ئەمساڵ دەکات کە بەشێوازی ئەلیکترۆنی ئامادە دەکرێت، چاوەڕێی یەکلاییبوونەوەی چارەنووسی مووچەی مانگی 12 و ڕێککەوتنی سیاسیی نێوان هەولێر و بەغدا دەکات، پێش ئەوەی لیستەکە بۆ بەغدا بنێرێت.