نزیکەی 25 هەزار فەرمانبەر بەیەکەوە خانەنشین دەبن

ئاڤا نیوز

 

حکومەتی هەرێمی کوردستان بە بڕیارێک تەمەنی خانەنشینی مووچەخۆران کەم دەکاتەوە و ماوەی خزمەتی کارکردنیش بۆ خانەنشینبوونی ئارەزوومەندانە 10 ساڵ زیاد دەکات. نزیکەی 25 هەزار فەرمانبەر خانەنشین دەبن.

 

وێنە گەورەکە: ماوەی شەش مانگە بەپێی یاسای ژمارەی 9ی خانەنشینی عێراق بەشێکی زۆری خانەنشینانی مەدەنی و پلە تایبەت مووچەکانیان هاوتاکراوە و وەریدەگرن، بە بڕیارێکی نوێ لە هەرێمی کوردستان تەمەنی خانەنشینی لە 63 ساڵییەوە بۆ 60 کەمدەکرێتەوە.

 

زانیاریی تایبەت: ئاڤا زانیویەتی بەجێبەجێکردنی ئەم بڕیارە لەدایکبووانی ساڵی 1965 خانەنشین دەبن کە تەمەنیان دەبێتە 60 ساڵ و ئەوانەی بڕیارەکە دەیانگرێتەوە نزیکەی 25 هەزار مووچەخۆرن، زیاتر لە حەوت هەزاریان لە سنووری بەڕێوەبەرایەتی خانەنشینی سلێمانین. 

 

ئەوەی پێویستە بیزانیت: ڕۆژی چوارشەممە، 15-1-2025، سەرۆكوەزیران مەسرور بارزانی، بە نووسراوی ژمارە 191 بڕیاری كەمكردنەوەی تەمەنی خانەنشینی لە 63 ساڵەوە بۆ 60 ساڵ دا، هاوكات ماوەی خزمەتی لە 15 ساڵەوە بەرز كردەوە بۆ 25 ساڵ بۆ كەسێک كە ئارەزوومەندانە داواكاری خانەنشینی پێشكەش بكات.

 

ئەمەش بزانە: ئەوانەی ڕەزامەندیی درێژكردنەوەی خزمەتی وەزیفییان لەلایەن سەرۆكایەتیی ئەنجوومەنی وەزیرانەوە بۆ کراوە لە خزمەت بەردەوام دەبن، تاوەكو تەواوبوونی ئەو ماوەیەی خزمەتی وەزیفییان بۆ درێژكراوەتەوە.