یەکەکانی 70 و 80 یەکدەخرێن و دەکرێن بە فەرماندەیی دەڤەر

ئاڤا نیوز

 

هەوڵەکانی یەکخستنەوەی هێزەکانی پێشمەرگە چڕترکراوەتەوە و ئێستا کار بۆ ئەوە دەکرێت یەکەکانی 70 و 80 یەکبخرێن و بکرێن بە فەرماندەیی دەڤەر، ئەمینداری گشتیی وەزارەتی پێشمەرگەش دەڵێت 'یەکێتی و پارتی پشتیوانی لە پرۆسەکە دەکەن و ئامادەی یەکگرتنەکەیان پیشانداوە'.

 

وێنە گەورەکە: کابینەی نۆی حکومەتی هەرێمی کوردستان کاری زۆری کرد بۆ یەکگرتنەوەی هێزەکانی پیشمەرگە، بەپێی ئەو لێکتێگەیشتنەش کە وەزارەتی پێشمەرگە و هێزەکانی هاوپەیمانان کردوویانە، تاوەکو ساڵی 2026 دەبێت هەموو هیزەکانی پیشمەرگە یەکخرابن، بنەمای سەرەکی بۆ بەردەوامی هاوکارییەکانی هاوپەیمانانیش بۆ پێشمەرگە، جێبەجێکردنی ئەو خاڵەی ڕێککەوتنەکەیە.

 

لێدوانی فەرمی: لیوا بەختیار محەممەد، ئەمینداری گشتیی هێزەکانی پێشمەرگەی کوردستان بە ئاڤا میدیای ڕاگەیاند: یەکەکانی 70 و 80 بۆ فەرماندەیی دەڤەر دەگۆڕدرێن، هەنگاوەکان بۆ ئەو مەبەستە بەهێواشی بەرەوپێش دەڕۆن، بەڵام تاوەکو کۆتایی ئەمساڵ دەبێت تەواوبکرێن.

 گوتیشی: 'پارتی و یەکێتی هاتنە پێشەوەیان باشە و ئەگەر بەم جۆرە هەنگاوەکان بە پرس و ڕا و هاوسەنگی بڕوات زۆر باش دەبێت'.