لە بازگەکانی حکومەتی عێراق ڕێگری لە هێلکەی سلێمانی دەکرێت

ئاڤا نیوز

نوێنەری خاوەن پڕۆژەکانی بەرهەمهێنانی هێلکە دەڵێت، دوو هەفتە زیاترە لە بازگەکانی حکومەتیی عێراق ئاستەنگ بۆ هەناردەی هێلکەی سلێمانی دروست دەکرێت.

وێنە گەورەکە: ئەگەرچی هەماهەنگی لەنێوان وەزارەتی کشتوکاڵی حکومەتی هەرێمی کوردستان و حکومەتی عێراق هەیە بۆ هاوردە و هەناردەی بەرهەمی ناوخۆیی، بەڵام لەماوەی ساڵی ڕابردوو ڕێگری لە چەندین جۆر بەرهەم گیراوە کە هەناردەی شارەکانی دیکەی عێراق بکرێن.

لێدوانی فەرمی: ئاکۆ محەممەد، نوێنەری خاوەن پڕۆژەکانی بەرهەمهێنانی هێلکە ڕایگەیاند:

- لە پارێزگای سلێمانی ئیدارەی ڕاپەڕین و گەرمیان 13 پڕۆژەی بەرهەمهێنانی هێلکەی خواردن هەیە، 15 ڕۆژ دەبێت ڕێگری دەکرێت بەرهەمەکانیان هەناردەی شارەکانی ناوەڕاست و خوارووی عێراق بکرێت.

- ئەم کێشەیە لە هەولێر و دهۆک چارەسەر کراوە، بەڵام هێشتا ڕێگە بە هەناردەی هێلکەی ئەم ناوچەیە نادرێت. لە کاتێکدا لەم ناوچەیە ڕۆژانە پێنج هەزار هێلکە بەرهەمدێت کە لە ڕۆژێکدا دەکاتە ملیۆنێک و 800 هەزار هێلکە.

- ئەگەرچی لەگەڵ وەزیری کشتوکاڵی حکومەتی هەرێمی کوردستان کۆبووینەتەوە، بەڵام هێشتا گرفتەکەمان بۆ چارەسەر نەکراوە و داوا دەکەین حکومەتیی هەرێمی کوردستان کێشەکەیان بۆ چارەسەر بکات.

 

هۆکارە زانراوەکان: بەپێی قسەی ئاکۆ محەممەد، ئەوان لەگەڵ بریکاری وەزیری کشتوکاڵی عێراق کۆبوونەتەوە، پێیان وتوون، سیاسەتی حکومەتی عێراق ئەوەیە بەرهەمی پڕۆژەکانی هەرێمی کوردستان کەمبکرێتەوە و تەنیا بەشی پارێزگاکانی خۆیان بەرهەم بهێنن. بەڵام ئەمە ناکرێت چونکە لە سلێمانی بە بەهای 150 ملیۆن دۆلار سەرمایەگوزاری لە پڕۆژەکانی بەرهەمهێنانی هێلکە کراوە و سێ هەزار کەس کاریان تێدا دەکات.