‎وەزارەتی پێشمەرگە بۆ هاووڵاتییان: نزیكی سەنگەرەگان مەبنەوە و تەقەش مەكەن

ئاڤا نیوز

شانەی ڕاگەیاندن و هۆشیاری وەزارەتی پێشمەرگەی هەرێمی کوردستان لەگەڵ نزیکبوونەوەی وەرزی سەیرانکردن چەند ڕێنماییەک دەداتە هاوڵاتیان، داوا دەکات نزیکی سەنگەرەکانی پێشمەرگە نەکەونەوە و بەهیچ شێوەیەکیش تەقە نەکەن.

بۆچی گرنگە: سنووری چیای قەرەچووغ بەردەوام هێزی پێشمەرگەی کوردستان بۆ ڕاوەدوونانی پاشماوەی چەکدارانی داعش ئۆپەراسیۆنی تێدا ئەنجام دەدات،بەشێک لەهاوڵاتیانیش لەگەڵ هاتنی وەرزی سەیران نزیکی ئەو ناوچەیە و چەند سەیرانگەیەکی دیکە کە نزیکی سەنگەرەکانن دەبنەوە.

ئاگاداری فەرمی: شانەی ڕاگەیاندن و هۆشیاری وەزارەتی پێشمەرگە لە ئاگادارییەکدا بۆ هاوڵاتیان چەند ڕێنماییەکی خستووەتەڕوو، یەکێک لە ڕێنماییەکان باس لەوەدەکات لەگەڵ نزیکبوونەوەی بەهار و دەستپێکردنی گەشت و سەیران هەست بەوە دەکرێت خەڵکێکی زۆر ڕوو لە ناوچەکانی بناری چیای قەرەچوغ و ئەو دەڤەرانەی تر بکەن کە نزیکن لە سەنگەرەکانی پێشمەرگە، "بۆیە بەهەموو شێوەیەک تەقەکردن قەدەغەیە و نزیکی سەنگەرەکانی پێشمەرگەش مەبنەوە".

زانیاريی زیاتر: شانەی ڕاگەیاندن و هۆشیاری وەزارەتی پێشمەرگە داواش لەهاوڵاتیان دەکات ژینگە بپارێزن و دار نەبڕن هاوکات باس لەوەشدەکات ڕاوکردن و قەدەغەیە و پاکڕاگرتنی شوێنی گەشت و سەیرانەکانیش بە ئەرکێکی نیشتیمانی دادەنێت.