ئاڤا زانیاریی نوێ لەبارەی جێبەجێکردنی یاسای نوێی تەمەنی خانەنشینی بڵاودەکاتەوە

ئاڤا نیوز

 

بڕیارە ڕێنمایی نوێ بۆ جێبەجێکردنی یاسای نوێی تەمەنی خانەنشینی لە هەرێمی کوردستان دەربکرێت، سەرچاوەیەکی باڵای بەڕێوەبەرایەتی گشتیی خانەنشینی هەرێمی کوردستانیش دەڵێت، "هەموو ئەو کەسانەی تەمەنیان گەیشتووەتە 60 ساڵ خانەنشین دەکرێن".

 

وێنە گەورەکە: ڕۆژی 15-1-2025، لە کۆبوونەوەی ئەنجوومەنی وەزیرانی هەرێمی کوردستان، بڕیاردرا هەر کەسێک بەگوێرەی ڕۆژ و مانگی لە دایکبوونی تەمەنی گەیشتبێتە بە 60 ، ساڵ خانەنشین دەکرێت.

 

لێدوانی فەرمی: سەرچاوەیەکی باڵا لە بەڕێوەبەرایەتی گشتیی خانەنشینی هەرێمی کوردستان بە ئاڤا میدیای ڕاگەیاند: هەموو ئەو کەسانەی تەمەنیان بووە بە 60 ساڵ، ئەمساڵ خانەنشین دەکرێن، واتە بڕیارەکەی ئەنجوومەنی وەزیران بۆ تەمەنی خانەنشینی جێبەجێ دەکرێت.

 

زانیاریی زیاتر: سەرچاوەیە گوتیشی: دوانیوەڕۆی ئەمڕۆ 19-1-2025، سەرۆکی دیوانی ئەنجوومەنی وەزیران لەگەڵ وەزیری دارایی و ئابووری کۆدەبێتەوە، هاوکات ڕێنمایی وەزارەتی دارایی و ئابووری بە بڕیارەکە دەردەچێت و دەخرێتە بواری جێبەجێکردنەوە.

 

زانیاریی بەدەستهاتوو: هەر فەرمانبەرێک 25 ساڵ خزمەتی هەبێت، ئەوا پێشینەی خانەنشینی 12 مانگی پێدەدرێت، هەر کەسێک خزمەتەکەی لە 25 ساڵ کەمتر بێت، پێشینەی خانەنشینی شەش مانگی پێدەدرێت.

 

ئەوەی پێویستە بیزانیت: ئێستا بەڕێوەبەرایەتیی گشتیی خانەنشینی هەرێمی کوردستان، چاوەڕوانی ناردنی لیستی ناوی ئەو کەسانەیە کە بۆ ساڵی 2025 خانەنشین دەبن، بۆ ئەوەی دەست بە ڕێکارەکانی خانەنشینبوونیان بکات.