دوای 12 ساڵ پڕۆژەیەکی جووتساید لە ئیدارەی گەرمیان قیرتاو دەکرێت

ئاڤا نیوز

پڕۆژەی جووتسایدی ڕێگەی شاکەل لە قۆناغی کۆتایی جێبەجێکردنە و قیرتاو دەکرێت.

چیرۆکی سەرەکی: لە 20-10-2013. بڕیاری جێبەجێکردنی پڕۆژەی جووتسایدی ڕێگەی شاکەل لە ناحییەی ڕزگاری سەر بە ئیدارەی گەرمیان دەرچوو، ماوەی 365 ڕۆژ بۆ تەواوکردنی دانرابوو، بەڵام بەهۆی قەیرانی داراییەوە کارەکانی ڕاگیرا و تێچووی پڕۆژەکە خرایە سەر پترۆ دۆلار.

وێنە گەورەکە: لە کابینەی نۆ بڕیاردرا ئەو پرۆژانەی لەسەر پارەی پترۆ دۆلارن بخرێنە سەر وەزارەتەکانیان، بۆ ئەم مەبەستەش لیژنەیەکی باڵا بە سەرۆکایەتیی ئەنجوومەنی وەزیران و ئەندامێتیی وەزارەتی دارایی و ئابووری و وەزارەتی پلاندانان پێکهێنراوە، بۆ ئەوەی میکانیزمێک بۆ چۆنییەتی گواستنەوەی پڕۆژەکان بۆ سەر وەزارەتە پەیوەندیدارەکان بدۆزنەوە.

لێدوانی فەرمی: جەمال ساڵح، بەڕێوەبەری ناحییەی ڕزگاری سەربە قەزای کەلار، بە ئاڤا میدیای ڕاگەیاند: پڕۆژەکە لە قۆناغی کۆتایدایە و فاریشە کراوە و بڕیارە ئەم هەفتەیە قیرتاو بکرێت.

زانیاریی زیاتر: پڕۆژەی جووتسایدی شاکەل درێژییەکەی 900 مەترە و تێچووەکەی یەک ملیار دینارە.

ئەوەی پێویستە بیزانیت: ئاڤا میدیا بەدواداچوون بۆ کێشە و ڕێگرییەکانی پڕۆژەکە کرد، هەروەها لە 3ی ئایاری 2024 زانیاری لەبارەی دەستپێکردنەوەی کارەکانی پڕۆژەکە ئاشکرا کرد.