ڕاکان جبووری: بۆ یەکلاییکردنەوەی کێشەکان چاوەڕێی بڕیاری دادگاین

ئاڤا نیوز

سەرۆكی هاوپەیمانی عەرەبی لە کەرکووک دەڵێت، پێکهێنانی حکومەتی خۆجێی کەرکووک دژی یاسا بووە و تیایدا ڕەچاوی بنەمای هاوبەشی لە حکومڕانیی نەکراوە، جەختیش دەکاتەوە کە بۆ یەکلاییکردنەوەی کێشەی حکومەتی پارێزگاکە چاوەڕێی بڕیاری دادگان.

ئەوەی پێویستە بیزانیت: 22ی ئەم مانگە دادگای كارگێڕی عێراق سکاڵایەکی تورکمان و بەشێک لە پێکهاتەی عەرەبی دژی یاساییبوونی حکومەتی خۆجێی کەرکووک تاوتوێ دەکات.

لێدوانی فەرمی: ڕاکان جبووری، سەرۆكی هاوپەیمانی عەرەبی و سەرۆکی بە تەمەن لە یەکەم دانیشتنی ئەنجوومەنی پارێزگای کەرکووک، دوای کۆبوونەوەی لەگەڵ بەرەی تورکمانیی، ئاماژەی بەوەكرد،

- "نەمانی هاوبەشی هەموو پێکهاتەکان لە حکومڕانی کەرکووکدا وەک مەترسییەک بۆسەر شارەکە دەبینین، بەڵام سەرەڕای پەراوێزخستنمان پەنامان بۆ شەقام نەبرد و دەمانەوێت بە یاسا و لەڕێگەی دادگا، ڕێڕەوی حکومڕانی و دۆخی سیاسی لە کەرکووک ڕاستبکەینەوە".

- ئەوەی ئێستا ڕودەدات تاکڕەوییە لە حکومڕانی پارێزگای کەرکووک و ئەنجوومەنی پارێزگاش توشی ئیفلیج بوون هاتووە و توانای بڕیاردانی نییە، هۆشدارییشیدا کە بەردەوامی ئەو دۆخەی ئێستا لە بەرژەوەندی کەرکووک و عێراقیش نییە.