دوای شەش ڕۆژ لە داخستنی ڕێگای ڕاپەڕین - سلێمانی کرایەوە

ئاڤا نیوز 

دوای نزیکەی هەفتەیەک لە داخستنی ڕێگەی سەرەکی ڕاپەڕین – سلێمانی لە لایەن هاووڵاتییانی ناحیەی بنگرد،  کە داوای چاککردنی ڕێگاکە و زیادکردنی کارەبای ناوچەکەیان دەکرد، ئەمڕۆ ڕێگاکە کرایەوە.

چیرۆکی سەرەکی: هاووڵاتییانی ناحیەی بنگرد، سەر بە قەزای دووکان نزیکەی یەک هەفتەیە ڕێگای بنگردیان داخستووە و خێمەیان هەڵداوە کە ڕێگای ڕاپەڕین – سلێمانی پێکەوە دەبەستێتەوە، بەهۆی خراپی ڕێگاکە و کەمی کارەبای ناحیەکە، داواکەن ناحیەکەیان بگوازرێتەوە بۆ قەزای ڕانیە.

ڕاگەیێنراوی فەرمی: ئەنجوومەنی گشتی ناڕەزایی خۆپیشاندەران، ڕایگەیاند: دوای هەفتەیەک هەڵدانی خێمە و داخستنی ڕێگاکە، ئەمڕۆ یەکشەممە نوێنەرانی خۆپیشاندەران و پیاوماقوڵان لەگەڵ قایمقامی دووکان لەسەر چەند خاڵێک گەیشتوونە ڕێکەوتن بۆ کردنەوەی ڕێگاکە بەم شێوەی خوارەوە:

 

 

-    بەزووترین کات ئەنجوومەنی پێکهاتووی خۆپیشاندەران لەتەواوی گوندەکان سەردانی قایمقامیەت بکەن بۆ چۆنیەتی خستنەوەسەری ناحيەی بنگرد بۆسەر ئیدارەی ڕاپەڕین.

 

-    لە ئێستادا کارەبای ناحيەکەمان بۆتە 13 کاتژمێر كە پێشتر 8 کاتژمێر بووە.

 

-    ئەو 600 ملیۆن دینارەی دەرچووە بۆ نۆژەنکردنەوەی ڕێگاکە بەزووترین کات دەرخستەی بۆ بکرێت و بخرێتە تەندەرەوە.

 

-    بەزووترین کات ئەگەر بە کاتیش بێت تا بنکەیەک دەکرێتەوە ئۆتۆمبێلی ئاگر کوژێنەوە دابین بکرێت.

 

 

ئەوەی پێویستە بیزانیت: لە ماوەی ڕابردوو هاووڵاتییانی ناحیەی خەڵەکان بە هەمان شێوە بەهۆی خراپی ڕێگاکەیان خۆپیشاندانیان ئەنجاندا و ڕێگای سەرەکی دووکان – ڕانیەیان داخست.