ناونیشانی وەزیفیی فەرمانبەرانی هەرێمی كوردستان لەگەڵ عێراق هاوتا دەكرێت

ئاڤا نیوز

ناونیشانی وەزیفی فەرمانبەرانی هەرێمی كوردستان لەگەڵ فەرمانبەرانی عێراق هاوتا دەکرێت، ڕێکارەکانیش دەستی پێكردووە، ئەویش دوای وەرگرتنی ڕەزامەندی لە حكومەتی عێراق پاڵپشت بەو یاسا نوێیەی ساڵی ڕابردوو لە پەرلەمانی عێراق دەرچووە.

بۆچی گرنگە: هاوتاکردنی ناونیشانی وەزیفی فەرمانبەرانی هەرێمی كوردستان دەبێتە هەنگاوێکی سەرەتایی بۆ پلەبەرزکردنەوەی فەرمانبەران کە زیاتر لە 10 ساڵە ڕاگیراوە و دەبێتە هۆی زیادبوونی مووچە.

نووسراوی فەرمی: ئەنجوومەنی وەزیرانی  هەرێمی كوردستان لە نووسراوێکدا داوا لەسەرجەم وەزارەت و فەرمانگە و دەستەکان دەكات، لە ماوەی حەوت ڕۆژدا زانیاریی پێویست لەبارەی ناونیشانی ئێستای سەرجەم فەرمانبەرانیان بنێرن، زانیاریی ئەو فەرمانبەرانەش بنێرن کە پێویستە ناونیشانیان بگۆڕدرێت.

زانیاریی زیاتر: هەرێمی کوردستان داوای کردووە کار بە یاسای نوێی میلاک بکرێت کە ساڵی ڕابردوو دەرچووە و لە عێراق کاری پێدەکرێت. هەردوو ئەنجوومەنی ڕاژەی نیشتمانی حكومەتی هەرێمی كوردستان و حكومەتی فیدڕاڵیش لەسەری ڕێککەوتوون.