بە 30 خولەک مۆڵەتی شۆفێری نێودەوڵەتی تەواودەبێت

ئاڤا نیوز

بەڕێوەبەرایەتی گشتیی هاتووچۆی هەرێمی کوردستان، ڕوونکردنەوەیەک لەبارەی دەرهێنانی مۆڵەتی شۆفێری نێودەوڵەتی بڵاودەکاتەوە و ڕایدەگەیەنێت سێ جۆری جیاوازی هەیە و خوازیار جۆرێکیان هەڵدەبژێرێت.

ڕاگەیێنراوی فەرمی: بەڕێوەبەرایەتی گشتیی هاتووچۆی هەرێمی کوردستان بڵاویکردەوە، مامەڵەی دەرهێنانی مۆڵەتی شۆفێری نێودەوڵەتی، لە بەڕێوەبەرایەتییەکانی هاتووچۆ لە ماوەی نیو کاتژمێردا تەواودەبێت و شۆفێران دەتوانن داوای مۆڵەتی یەک ساڵی تاوەکو سێ ساڵی بکەن و بۆ هەریەکێکیان تێچوویەکی جیاوازییان هەیە.

زانیاری زیاتر: جۆرەکانی مۆڵەتی شۆفێری نێودەوڵەتی لە هەرێمی کوردستان بەپێی ڕێنمایی ژمارە 7ی ساڵی 2022، لەنێوان یەک ساڵی تاوەکو سێ ساڵی هەیە و شێواز و تێچووەکانیشییان جیاوازە.

 

- مۆڵەتی یەک ساڵی بڕی 50 هەزار دیناری تێدەچێت

- مۆڵەتی دوو ساڵی بڕی 100 هەزار دیناری تێدەچێت

- مۆڵەتی سێ ساڵی بڕی 150 هەزار دیناری تێدەچێت

 

هەر کەسێکیش خوازیاری دەرهێنانی مۆڵەتی شۆفێری نێودەوڵەتی بێت، دەبێت ئەم پێداویستیانەی پێبێت.

 

- مۆڵەتی شۆفێری عێراقی، تایبەت یان گشتی هەبێت و کارابێت و ماوەی بەسەرچوونی لە سێ مانگ کەمتر نەبێت.

- پاسپۆرتی عێراقی هەبێت و ماوەی بەسەرچوونەکەشی لە شەش مانگ کەمتر نەبێت.

- دوو وێنەی ڕەنگاوڕەنگی کەسەکە بۆ مامەڵەکەی پێویستە.

 

ئەوەی پێویستە بیزانیت: مامەڵەی دەرهێنانی مۆڵەت شۆفێری نێودەوڵەتی لە هەموو بەڕێوەبەرایەتییەکانی هاتووچۆ لە پارێزگا و ئیدارە سەربەخۆکان دەکرێت و لە هەموو بەڕێوەبەرایەتییەکانیش هاوشێوەی یەک هەمان کات و تێچوویان هەیە.