ڕادەستکردنی لیستی مووچەی مانگی یەک دوادەکەوێت

 

ئاڤا نیوز

ئامادەکارییەکانی وەزارەتی دارایی و ئابووری هەرێمی کوردستان بۆ لیستی مووچەی مانگی یەکی مووچەخۆران بەردەوامە، بەهۆی تەواونەبوونی ڕێکارەکان و پەیڕەوکردنی سیستمی نوێ، ڕادەستکردنی لیستەکە دوادەکەوێت.

وێنە گەورەکە: 20 ڕۆژ لە مانگی یەکی ساڵی نوێ تێپەڕدەبێت، بەهۆی گۆڕینی شێوازەکەی، ڕادەستکردنی لیستەکە بە بەغدا دواکەوتووە و بەشێک لە وەزارەتەکان هێشتا لیستەکەیان بۆ گەنجینەکان نەناردووە.

زانیاریی تایبەت: سەرچاوەیەکی باڵا لە وەزارەتی دارایی بە ئاڤای گوت، "بەهۆی ئەوەی لیستی مووچەی مانگی یەکی مووچەخۆرانی هەرێمی کوردستان بە ئەلیکترۆنی کراوە و بە سیستمی پەیڕۆل دەبێت کاتی زیاتری پێویستە بۆ ئەوەی ئامادەبکرێت، ڕەنگە لەم هەفتەیە نەتوانین ڕادەستی بکەین و بکەوێتە هەفتەی داهاتوو".

لەلایەکی دیکەوە: ئەمڕۆ شاندێکی باڵای حکومەتی هەرێمی کوردستان، کە پێکهاتوون لە ئومێد سەباح، سەرۆکی دیوانی ئەنجوومەنی وەزیران، ئاوات شێخ جەناب، وەزیری دارایی و ئابووری، ئامانج ڕەحیم، سکرتێری ئەنجوومەنی وەزیران، بۆ ڕێککەوتنی نوێ لەسەر پرسی مووچەی مووچەخۆران لە بەغدا لەگەڵ تەیف سامی، وەزیری دارایی عێراق کۆدەبنەوە.