هۆشیار زێباری: لەگەڵ یەکێتی 85%ی کارنامەی سیاسی حکومەتمان تەواوکردووە

 

ئاڤا نیوز

سەرۆکی شاندی دانوستانکاری پارتی بۆ پێکهێنانی کابینەی نوێی حکومەتی هەرێمی کوردستان دەڵێت، لەگەڵ یەکێتی 85%ی کارنامەی سیاسی حکومەتیان تەواوکردووە و ئومێدیشیان هەیە کە کابینەی نوێی حکومەت لە دوو مانگی داهاتوودا پێکدەهێنرێت.

وێنە گەورەکە: بۆ پێکهێنانی کابینەی دەیەمی حکومەتی هەرێمی کوردستان گفتوگۆکانی پارتی و یەکێتی بەردەوامن، بڕیارە لە چەند ڕۆژی داهاتووشدا لیژنەی تەکنیکی هەردوولا جارێکی دیکە کۆببنەوە، لەم کۆبوونەوانەدا باس لە پۆستەکان ناکرێت و تەنیا کارنامەی حکومەت دەنوسرێتەوە.

لێدوانی فەرمی: هۆشیار زێباری، ئەندامی مەکتەبی سیاسی پارتی و سەرۆکی شاندی دانوستانکاری ئەو حیزبە بۆ پێکهێنانی کابینەی نوێی حکومەتی هەرێمی کوردستان، لە چاوپێککەوتنێکدا لەگەڵ کەناڵی شەمس ئاماژەی بەوەکردووە، گفتوگۆکان لەگەڵ لایەنە براوەکانی هەڵبژاردنی پەرلەمانی کوردستان، بۆ پێکهێنانی کابینەی نوێی حکومەت گەیشتووەتە قۆناغێکی "زۆر پێشکەوتوو".

وتیشی، گفتوگۆ بنەڕەتییەکان لەگەڵ یەکێتی نیشتیمانی کوردستانن و لەگەڵ ئەو حیزبە 85%ی کارنامەی سیاسی کابینەی نوێیان تەواو کردووە، بۆیە ئومێدی ئەوەیان هەیە کە کابینەی نوێی حکومەتی هەرێمی کوردستان لە دوو مانگی داهاتوودا پێکدەهێنرێت.