بانكی نێودەوڵەتیی پەیوەندیی ڕاستەوخۆ لەگەڵ هەرێمی كوردستان بوونیاد دەنێت

ئاڤا نیوز

بانكی نێودەوڵەتی بۆ جێبەجێكردنی پڕۆژە ستراتیژییەكان هەماهەنگی ڕاستەوخۆ لەگەڵ حكومەتی هەرێمی كوردستان دەكات كە لە ساڵی 2018ـەوە پەیوەندیی نێوانیان كز و لاواز بووە.

وێنە گەورەكە: دكتۆر دارا ڕەشید، وەزیری پلاندانانی حكومەتی هەرێمی كوردستان پێشوازی لە ئیمانوێڵ سالیناس، نوێنەری تایبەتی بانكی نێودەوڵەتی كرد و لە كۆبوونەوەكەدا باس لە گرنگیی بنیاتنانەوەی سەرلەنوێ پەیوەندیی ڕاستەوخۆی بانكی جیهانی لەگەڵ حكومەتی هەرێمی كوردستان كرا.

لێدوانی فەرمی: سیروان محەممەد، بریكاری وەزارەتی پلاندانان تایبەت بە ئاڤا میدیا ڕایگەیاند:

- لە چوارچێوەی بەرنامە و پڕۆژەكانی بانكی جیهانی، پێدانی قەرز بە سووی كەم و درێژخایەن بۆ وڵاتان دابین دەکات بۆ جێبەجێكردنی پڕۆژە ستراتیژییەكانی هاوشێوەی پڕۆژەی ڕێگاوبان، كارەبا و وزەی نوێ.

- ئێمە لە وەزارەتی پلاندانان پێویستیمان بە هاوكاری و قەرزە ڕاستەوخۆكانی بانكی جیهانی هەیە بۆ جێبەجێكردنی پڕۆژە ستراتیژییەكان.


ئەوەی پێویستە بیزانیت: لە نێوان ساڵانی 2007 تاکو 2018، حكومەتی هەرێمی كوردستان پەیوەندییەكی باش و پتەوی لەگەڵ بانكی جیهانی هەبوو، دواتر بەهۆی سەرهەڵدانی كێشەكانی نێوان هەولێر و بەغدا، ئەو پەیوەندییە بەرە بەرە كز و لاواز بوو، ئێستاش حكومەتی هەرێمی كوردستان مەبەستیەتی سەرلەنوێ پەیوەندییەكان دروست بكاتەوە.