بۆ جێبەجێکردنی ڕێنماییەکی نوێ، 10 ڕۆژ مۆڵەت دەدرێتە پاڵاوگەکان

ئاڤا نیوز

 

وا بڕیارە قۆناغێکی دیکەی جێبەجێکردنی مەرجە ژینگەییەکان بۆ پاڵاوگەکانی سنووری پارێزگای هەولێر دەستپێبکات و ئەمجارە کۆمەڵێک ڕێنمایی نوێیان پێدەدرێت.

 

وێنە گەورەکە: بەهۆی زیادبوونی ڕێژەی پیسبوونی هەوای هەولێر، حکومەتی هەرێمی کوردستان کۆمەڵێک ڕێنمایی نوێی دەرکردووە، دیارترینیان هەموو ئەو شوێنانەی پاشماوەی دوکەڵیان هەیە پێویستە ئاگری سەر لوولە دووکەڵکێشەکان هەڵبکرێت.

 

لێدوانی فەرمی: دڵشاد هیرانی، بەڕێوەبەری گشتیی فەرمانگەی ژینگەی هەولێر بە ئاڤا میدیای وت، ئەمڕۆ سێشەممە قۆناغێکی دیکە دەستپێدەکات، لەم قۆناغەدا پێویستە پاڵاوگەکان پاشماوەی ناوەوەی پاڵاگەکان چارەسەر بکەن و نەهێڵن تێکەڵ بە ئاوەڕۆ بێت و تەنیا 10 ڕۆژ مۆڵەتیان هەیە.

 

بە وتەی دڵشاد هیرانی، لە قۆناغی یەکەمدا 57 پاڵاوگە بە یەکجاری داخران و ئیدی بۆیان نییە بیکەنەوە، ئەو پاڵاوگانەشی ماون و پابەندی ڕێنماییەکان بوون دەبێت جگە لە دانانی فلتەر، 24 کاتژمێر ئەو کاتەی کار دەکەن ئاگری سەرەوەی لوولەکان دابگیرسێنن، چونکە ئەو ئاگرە دەبێتە هۆی سووتانی گاز و نەمانی بۆنی ناخۆش.

 

لەلایەکی دیکەوە: نەبەز عەبدولحەمید، قایمقامی هەولێر بۆ ئاڤا میدیا وتی، لەماوەی ڕابردوو 25 کەس لەسەر پاڵاوگە نایاساییەکان دەستگیر کرابوون، لەم دوو ڕۆژەی ڕابردوودا سێ کەسی دیکەش دەستگیرکراون.

 

ئەوەی پێویستە بیزانیت: داتای پێشووتری فەرمانگەی ژینگەی هەولێر دەریدەخات، 138 پاڵاوگە لە سنووری پارێزگای هەولێر هەبوون، بەڵام بەشێک لەو پاڵاوگانە کارەکانی خۆیان گۆڕیووە، هەندێکیان ئێستا کاری قیر دەکەن و هەندێکی دیکەیان کاری ئایزۆگامی دەکەن.

 

باکگراوند: ڕۆژی 12ـی ئەم مانگە، سەرۆکوەزیران مەسرور بارزانی کۆبوونەوەی لەگەڵ بەرپرسانی کارگێڕی هەولێر و دهۆک ئەنجامدا، لە کۆبوونەوەکە چوار بڕیاردران، یەکێک لە بڕیارەکان پەیوەست بوو بە پاڵاوگەکان، هەر پاڵاوگەیەک یان کارگەیەک لە دەرەوەی مەرج و ڕێنماییەکان کار بکات و بێتە هۆی پیسبوونی ژینگە ڕێکاریی یاسایی بەرامبەر دەگیرێتەبەر.