شاندی تەکنیکی پارتی و یەکێتی لەبارەی نووسینەوەی کارنامەی کابینەی نوێ کۆدەبنەوە

ئاڤا نیوز

 

بەمەبەستی نووسینەوەی کارنامەی پێکهێنانی کابینەی نوێی حکومەتی هەرێمی کوردستان شاندێکی تەکنیکی پارتی دیموکراتی کوردستان لە هەولێر سەردانی مەکتەب سیاسی یەکیتی کرد. 

 

وێنە گەورەکە: ئەمڕۆ جارێکی دیکە لیژنەی تەکنیکی پارتی و یەکێتی کۆدەبنەوە، ئەمە دەبێتە چوارەم کۆبوونەوەی شاندی تەکنیکی هەردوولا بۆ پێکهێنانی حکومەت، دوو کۆبوونەوەی سیاسیشیان کردوون، ئەمە جگە لە کۆبوونەوەی دووقۆڵی سەرۆکوەزیران بارزانی و بافڵ تاڵەبانی، سەرۆکی یەکێتی.

 

زانیاریی بەدەستهاتوو: شاندێکی تەکنیکی پارتی دیموکراتی کوردستان لە هەولێر سەردانی مەکتەب سیاسی یەکێتی نیشتمانی کوردستانی کرد و لە کۆبوونەوەدان لەبارەی تەواوکردنی نووسینەوەی کارنامەی پێکهێنانی کابینەی نوێی حکومەتی هەرێمی کوردستان.

 

زانیاریی پەیامنێر: هیشام سەعید، پەیامنێری ئاڤا میدیا ڕایگەیاند: ئەمە کۆبوونەوەی چوارەمی شاندی تەکنیکی هەردوولایە بۆ گفتوگۆکردن لەسەر نووسینەوەی ڕەشنووسی کابینەی نوێی حکومەتی هەرێمی کوردستان. دوای ئەم کۆبوونەوەیە هەردوولا ناوەڕۆکی کۆبوونەوەکە بە یەک پاکێج دەبەنە نێو کۆبوونەوەیەکی سیاسی، ئینجا لەوێ پۆستە باڵاکان یەکلایی دەکرێنەوە، لە هەرسێ سەرۆکایەتییەکە، هەرێم و حکومەت و پەرلەمان و وەزارەتەکان. 

 

زانیاریی تایبەت: بەپێی زانیارییەکانی ئاڤا، هەردوولا لەسەر زۆربەی دەسەڵاتەکانی سەرۆکی هەرێم، سەرۆکی حکومەت، جێگرەکانی هەردوو سەرۆکی هەرێم و حکومەت، دەسەڵاتی وەزیرەکان، بریکاری وەزیرەکان، پارێزگارەکان و بەڕێوەبەرە گشتییەکان، لەبارەی دەسەڵاتە ئیداری و داراییەکان ڕێککەوتوون.