دۆناڵد ترەمپ لە یەکەم ڕۆژی دەستبەکاربوونی چەند بڕیارێکی گرنگی دەرکرد

ئاڤا نیوز

 

دۆناڵد ترەمپ لەگەڵ دەستبەکاربوونی چەند بڕیارێک و لێدوانێکی گرنگی لەبارەی ناوخۆی وڵاتەکەی و وڵاتانی دیکەی جیهان دەرکرد و هەڵوێستی خۆی لەبەرامبەر چەندین پرسی جیاوازیش دەربڕی. 

 

وێنە گەورەکە: ڕۆژی دووشەممە، دۆناڵد ترەمپ وەک 47ـەهەمین سەرۆکی ئەمریکا دەستبەکاربوو و چەندین بڕیاری نوێی لە یەکەم ڕۆژی دەستبەکاربوونی واژۆکرد و وڵاتانی ڕۆژهەڵاتی ناوەڕاست بە هێنانەدی سەقامگیری بۆ ناوچەکەیان ناوی دەبەن.

 

زانیاریی زیاتر: دۆناڵد ترەمپ، سەرۆکی ئەمریکا لە مەراسیمی دەستبەکاربوونی وەڵامی چەند پرسیارێکی جیاوازی دایەوە کە گرنگترینیان ئەمانە بوو:- 

 

- لە وەڵامی پرسیارێک سەبارەت بە شەری ئیسرائیل و غەززە ڕاگەیاند: ئەوە شەڕی ئێمە نییە، شەڕی ئەوانە. بەڵام دڵنیا نیم لەم ڕێککەوتنە.

 

- هاوکات لە بارەی ڕووسیاوە ڕایگەیاند، پووتین پێویستە ڕێککەوتن لەگەڵ ئۆکراینادا بکات، چونکە بە ئەنجامنەدانی ڕێککەوتن ئەو ڕووسیا تێکدەدات و لەناوی دەبات. باسی لەوەشکرد "من لەگەڵ پووتین سەرۆکی ڕووسیا بەباشی دەتوانم ڕێکبکەوم، هیوای خواست کە پووتین ئامادە بێت بۆ ئەم کارە".

 

- هاوکات لەبارەی چین ڕایگەیاند، "ئامادەم لە ساڵی 2025 سەردانی چین بکەم ئەگەر بانگهێشتنامەیەکی فەرمیم لەلایەن چینەوە پێبگات"

 

لەلایەکی دیکەوە: لە یەکەم ڕۆژی دەستبەکاربوونی ترەمپ فەرمانی کشانەوەی ئەمریکا لە ڕێکخراوی تەندروستی جیهانی دەرکرد، ئەمەش بەهۆی هەڵە مامەڵەکردنی ڕێکخراوەکەیە لەگەڵ پەتای کۆڤید-19، باسی لەوەشکرد، "ئێمە زیاتر لە چین پارە دەدەین بە ڕێکخراویی تەندروستیی جیهانی و ئەو فێڵیان لە ئێمە کردووە".

 

بەتەنیشت ئەم بابەتەوە: ترەمپ لە ڕێگەی پۆستێکی لە تۆڕی کۆمەڵایەتیی سۆشیاڵ تروسەوە، چوار بەرپرس لە کارەکانیان دووردەخاتەوە و ئاماژەی بەوەش کردووە کە جگە لەم چوار کەسە زیاتر لە هەزار کەسی دیکەش دەردەکرێن. ئەو کەسانەش پێکهاتوون لە:- 

 

- خۆسێ ئەندرێس، لە ئەنجوومەنی سەرۆکایەتی بۆ وەرزش، لەشساغی و خۆراک.
- مارک میلی، لە ئەنجوومەنی ڕاوێژکاری ژێرخانی نیشتمانی.
- برایان هوک، لە ناوەندی ویڵسۆن بۆ توێژەران.
- کێیشا لانس بۆتۆمس، لە ئەنجوومەنی سەرۆکایەتی بۆ هەناردەکردن.

 

گۆشەیەکی دیکەی دیمەنەکە: دۆناڵد ترەمپ لە وتاری دەستبەکاربوونیدا ئاماژەیی بەوەکرد، کەناڵی پەنەما دەگەڕێنێتەوە بۆ ئەمریکا بەهۆیەوە سەرۆکی پەمانا وەڵامی ترەمپ دەداتەوە و دەڵێت:'' کەناڵی پەنەما هی پەنەمایە و هەر بەم جۆرەش دەمێنێتەوە، پەنەما کەناڵەکەی بەڕێوەبردووە''.