لە گەرمیان کێشە دەکەوێتە نێوان کارمەندێکی کۆماندۆ و هێزێکی ئاسایش

ئاڤا نیوز 

 

کێشە دەکەويتە نێوان هێزێکی کۆماندۆ و هێزێکی ئاسایشی مەیدانی سەر بە ئیدارەی سەربەخۆی گەرمیان هەردوو هێز یەکدی تۆمەتبار دەکەن کە خەتابارن و ئاسایشی مەیدان سکاڵا لەسەر هێزەکەی کۆماندۆ تۆمارکردووە.

چیرۆکی سەرەکی: ڕۆژی یەکشەممەی ڕابردوو 19-1-2025 کەسێک لەناو باخێکا لەنزیک ناحیەی مەیدان هەڕەمەکی تەقەی کردووە، ئەم کەسە ئەندامی کۆماندۆیە،  هێزێکی ئاسایشی مەیدانیش چوون دەستگیریان کردووە.

زانیاریی بەدەستهاتوو: ئاڤا زانیویەتی کە تەقەکەرەکە براوە بۆ بەڕێوەبەرایەتیی ئاسایشی گەرمیان لەکەلار. دواتر هێزێکی کۆماندۆ چوونەتە  ناحیەی مەیدان و گەمارۆی بنکەی ئاسایشیانداوە کارمەندێکی ئاسایشیان دەستگیر کردووە.

 

لێدوانی فەرمی: سەرچاوەیەکی  ئاسایش لە گەرمیان ڕاگەیاند، دوو شت دەکەین: یەکەم سکاڵا لەسەر ئەو کەسەی لەناو باخەکە تەقەی کردبوو، دووەمیش ئەو مەفرەزەی کۆماندۆ دەبێت لێپێچینەوەیان لەگەڵ بکرێت.

فەرماندەیەکی باڵای هێزەکانی کۆماندۆش بە ئاڤا میدیای ڕاگەیاند، شتەکە بەو شێوەیە نییە، سەرەتا ئاسایشی چەکیان لە هێزەکەی کۆماندۆ ڕاکێشاوە بۆیە کێشەکە درووست بووە، بەڵام ئێستا کێشەکە چارەسەر بووەو هیچ سکاڵایەکیش تۆمار نەکراوە.

قووڵتر: ئاڤا زانیویەتی کە  کۆماندۆ هەڕەشەیان لە بەڕێوەبەری ئاسایشی گەرمیان کردووە، دواتر بەرپرسانی ئەمنی گەرمیان تەداخول ئەکەن و دۆخەکە هێور دەکەنەوە، کارمەندەکەی کۆماندۆ لە ئاسایشی گەرمیان ئازاد دەکرێت و لەبەرامبەردا کۆماندۆش کارمەندەکەی ئاسایشی مەیدان ئازاد ئەکات.

لەلایەکی دیکەوە: ئاسایشی مەیدانیش سکاڵا لەسەر هێزەکەی کۆماندۆ تۆماردەکەن و فەرمانی دەستگیرکردن بۆ بەرپرسی هێزەکە دەردەچێت، بەڵام تا ئێستا دەستگیر نەکراوە.