كۆتایی بە بەرهەمهێنانی سەوزە بە ئاوی زێراب دەهێنرێت

ئاڤا نیوز 

هەڵمەتی تێكدانی ئەو زەوییانەی سەوزەیان بە پاشەڕۆی زێراب تێدا بەرهەم دەهێنرێت بەردەوامە و قایمقامی قەزای ناوەندیی هەولێریش دەڵێ تاوەكو تێكدانی دوا زەوی بەردەوام دەبین.

وێنە گەورەکە: لەسەر ڕێڕەوی ئاوەڕۆی هەولێر چەندین کێڵگەی بەرهەمهێنانی سەوزە هەن و بەو ئاوەڕۆیە ئاو دەدرێن کە پاشماوەی ئاوی قورسی ماڵانە، بەشی زۆریان دەکەونە ڕۆژئاوای شاری هەولێر، بەدیاریکراوی ڕێگای نێوان مووسڵ و کەرکووک جگە لە هەولێر لە چەند شار و شارۆچكەیەكی دیكەی هەرێمی كوردستانیش هەمان حاڵەت هەیە بەڵام بە ڕێژە و ژمارەی كەمتر.

لێدوانی فەرمی: نەبەز عەبدولحەمید، قایمقامی قەزای ناوەندیی هەولێر بە ئاڤا میدیای ڕاگەیاند: "هەڵمەتی تێكدانی ئەو زەوییە كشتوكاڵیانەی كە سەوزەیان تێدا بە ئاوی زێراب بەرهەم دەهێندرێت بەردەوامە، تاوەكو دوا خاڵ بەردەوام دەبین".

زانیاریی زیاتر: لە ڕۆژانی ڕابردوو 800 دۆنم زەویی دیكە و زیاتر لە 100 خانووی پلاستیكی كە بەشێوەی زێدەڕۆ لەسەر ئاوی زێراب و ئاوەڕۆ و ئاوی قورس دروستكرابوون تێكدران.

باکگراوند: ڕۆژی 12ـی ئەم مانگە، سەرۆکوەزیران مەسرور بارزانی چوار بڕیاری تایبەت بە پاكڕاگرتنی ژینگەدا و یەكێك لە بڕیارەكان بریتییە لە ڕێگری لە بەکارهێنانی ئاوی پیس و ئاوەڕۆکان بۆ ئاودانی سەوزە و ئاودێری .