تەواونەكردنی ڕێگەی نێوان قەڵادزێ و مەرزی كێلێ هاووڵاتیانی نیگەران كردووە

ئاڤا نیوز

تەواونەكردنی ڕێگەی نێوان قەڵادزێ و مەرزی كێلێ هاووڵاتیانی ئەو سنوورەی نیگەران كردووە و بەڕێوەبەری گشتیی ڕێگاوبانی ئیدارەی ڕاپەڕینیش دەڵێت، پێدانی پارەی نەختینە بە پڕۆژەكە وەستاوە. 

وێنە گەورەكە: نزیكەی ساڵێك لەمەوبەر، وەزیری ئاوەدانكردنەوە و نیشتەجێكردن بەردی بناغەی پڕۆژەی ڕێگەی قەلادزێ-دارەشمانەی دانا كە درێژایی ڕێگاكە 10 كیلۆمەترە و گوژمەی دوو ملیار و 875 ملیۆن دینار بۆ تەواوكردنی پڕۆژەكە تەرخانكرا، بەڵام سەرەڕای تێپەڕبوونی ئەو ماوەیەی بۆ تەواوكردنی پڕۆژەكە دانرابوو، كەچی پڕۆژەكە بە تەواونەكراوی ماوەتەوە.

گرفتەكە چییە: بەهۆی تەواونەكردنی پڕۆژەكە، ئاستەنگی هاتووچۆ لەنێوان قەڵادزێ و مەرزی كێلێ بۆ شۆفێران و بارهەڵگرەكان دروستبووە.

لێدوانی فەرمی: ئومێد حەمە، بەڕێوەبەری گشتیی ڕێگاوبانی ئیدارەی ڕاپەڕین تایبەت بە ئاڤا میدیا ڕایگەیاند:

- هۆكاری تەواونەكردنی پڕۆژەكە؛ پێنەدانی پارەی نەختینەیە لە بانك.

- پڕۆژەكە لە هەنگاوی قیرتاوكردن دایە، بەڵام لەبەر زستان و بەفر و بارانبارین ئێستا ناتوانین پڕۆژەكە تەواوبكەین.
 
خاڵە ئەرێنییەکان: ڕێگەی نێوان قەڵادزێ-مەرزی كێلێ، یەکێکە لە پرۆژە ستراتیژییەکانی حكومەتی هەرێمی كوردستان، جگە لەوەی ڕێگەیەکی سەرەکیی هاتووچۆی هاووڵاتییانە لە سنورەکە، هاوکات ڕێگەیەکی بازرگانییە و دەروازەی سنووری کێلێ بە قەڵادزێ دەبەستێتەوە، لەڕووی گەشتیارییەوە سودێکی گەورەی بۆ ناوچەکە دەبێت.