ژمارەیەک هاووڵاتی ئەفغانى و پاکستانى و فلیپینى لە شارەزوور دەستگیرکران

ئاڤا نیوز

 

لە قەزای شارەزوور ژمارەیەک هاووڵاتی ئەفغانى و پاکستانى و فلیپینى دەستگیرکران کە بە نایاسایی هاتبوونە خاکی هەرێمی کوردستان و بەرەو شارەکانی باشووری عێراق دەڕۆشتن. 

 
وێنە گەورەکە: ئەو هاووڵاتییانەی دەستگیرکراون، خەڵکی ئەفغانستان و پاکستان و فلیپین بوون، بەشێوەی یاسایی چوونەتە خاکی ئێران بەڵام لەوێوە بەنایاسایی هاتوونەتە هەرێمی کوردستان و ویستوویانە بەرەو باشووری عێراق بڕۆن، بەڵام لە قەزای شارەزوور لەلایەن هێزەکانی ئاسایش دەستگیرکراون.

 

لێدوانی فەرمی: نەوزاد سەعید، بەڕێوبەری یاریدەرێتی ئاسایشی شارەزوور، بە ئاڤا میدیای ڕاگەیاند: "دوای کۆکردنەوەی زانیاریی و چاودێریکردن توانرا 13 هاووڵاتیى ئەفغانى و پاکستانى و فلیپینى دەستگیربکەین، کە لە هەوڵدابوون بە شێوەیەکى نایاسایى بەرەو باشووری عێراق بڕۆن".

 

چۆن دەستگیرکراون: نەوزاد سەعید، گووتی: "لەسەر رێگای قەزای شارەزوور بۆ دەربەندیخان نزیک گوندی میرەدێ، لەژێر پردێکی پەڕینەوە 13 کەسەکەمان دەستگیرکرد، ئەو کەسانە بەشێوەیەکى نایاسایى لە ئێرانەوە هاتوونەتە هەرێمى کوردستان و ویستویانە بەرەو ناوچەکانى باشووری عێراق بڕۆن".

 

ئەوەی پێویستە بیزانیت: بەوتەی لایەنە ئەمنییەکان، هەندێکجار هاووڵاتییانی بیانی بەتایبەت خەڵکی ئەفغانستان و پاکستان و فلیپین و چەند وڵاتێکی دیکە، ڕێگەی هەرێمی کوردستان بە نایاسایی دەگرنەبەر وەک ڕێگەی گەشتن بە تورکیا، ناوبەناویش ئەو کۆچبەرە نایاساییانە لەلایەن هێزە ئەمنییەکان دەستگیر دەکرێن.