وەرزشوانانی ناحیەی دارەتوو داوای نۆژەنکردنەوەی یاریگەکەیان دەکەن

 

ئاڤا نیوز

وەرزشوانانی ناحیەی دارەتوو لە شاری هەولێر، ناڕازین لە نۆژەننەکردنەوەی یاریگاکەیان و داوا لە ئاڤا دەکەن دەنگییان بگەیەنێت و هەوڵی چارەسەرکردنیان بۆ بدات.

چیرۆکی سەرەکی: ناحیەی دارەتووی شاری هەولێر، یاریگایەکی 11 یاریزانی تۆپی پێی هەیە، بەڵام کەڵکی یاریکردنی تێدا نەماوە و تێکچووە و پێویستی بە نۆژەنکردنەوە هەیە، ماوەی چوار مانگە یاریگاکە بەرەو ڕووی وەرزشوانان داخراوە بێجگە لەمە خزمەتگوزاری تێدانیە.

زانیاریی پەیامنێر: بەشێک لە وەرزشوانانی ئەو ناحیەیە دەڵێن: شەش ساڵە بەڵێنیان پێدراوە یاریگاکەیان بۆ نۆژەنبکرێتەوە، بۆیە داوا لە وەزیری وەرزش و لاوان و پارێزگاری هەولێر دەکەن چارەسەرێکیان بۆ بکات.

لێدوانە فەرمییەکان: سەبارەت بە داواکارییەکەیان، ئاڤا پەیوەندیکرد بە هەریەک لە پارێزگاری هەولێر و بەڕیوەبەری ناحیەی دارەتوو،

- ئەحمەد نەبی، بەڕێوەبەری ناحیەی دارەتوو، بە ئاڤا میدیای ڕاگەیاند، ئەوان دەرخستەیان بۆ یاریگەکە کردووە و بۆ پارێزگای هەولێر نێردراوە و چاوەڕێی ئەوەن پارەی بۆ خەرج بکرێت بۆ ئەوەی دەست بە نۆژەنکردنەوەی بکرێت.

- ئومێد خۆشناو، پارێزگاری هەولێر گوتی: نۆژەنکردنەوەی یاریگاکە پەیوەندی بە ڕاگرتنی بودجەوە هەبووە، بەڵام لەگەڵ پەسەندکردنی بودجە و هاتنی پارەکە کار بۆ یاریگاکەش دەکەن.