کوشتنی منداڵێک لە بۆکان کاردانەوەی فراوانی لێ دەکەوێتەوە

 

ئاڤا نیوز

کوژرانی منداڵێکی تەمەن حەوت ساڵی خەڵکی بۆکان، خەڵکی شارەکە و ژمارەیەکی زۆری هاوڵاتیانی ئێرانی توڕە کردووە و بەهۆیەوە ڕژانە سەرشەقام.

چیرۆکی سەرەکی: لە 17ـی 1ـی 2025 "نیان جوبرەئیل پور"ـی تەمەن حەوت ساڵ هاوڵاتی ڕۆژهەڵاتی کوردستان کە ئاسەواری ئەشکەنجە و خوێن بەربوونی هەبوو گەیێنرایە نەخۆشخانەیەک لە شاری بۆکان، بەڵام بە هۆی سەختی حاڵەتەکەیەوە کە تەنها گورچیلەیەکیشی کاری دەکرد گیانی لەدەستدا.

ڕاگەیێنراوی فەرمی: موسا بەهاری بەڕێوەبەری پۆلیسی بۆکان لە کۆنگرەیەکی ڕۆژنامەوانیدا گوتی " چوار گومانلێکراوی سەرەکی کوشتنی  ئەم منداڵە دەستگیرکراون." بەگوێرەی وتەکانی بەهاری، باوکی نیان کە لە دایکی جیابووەتەوە، پەیوەندییەکی "ناتەندروست"ـی لەگەڵ ژنێکدا هەبووە. برای ئەو ژنە کە تۆمەتباری یەکەمی ئەم کەیسەیە، دوای دەستگیرکردنی دانی بەوەدا نا کە دەستدرێژی کردووەتە سەر نیان.

هۆکارە زانراوەکان: بە پێی قسەکانی بەهاری، لە پاش لێکۆڵینەوە لە تەرمی نیان، دەرکەوتووە دەستدرێژی سێکسی کراوەتە سەر، هەروەها ئەشکەنجەی زۆر دراوە و هۆکاری مردنەکەشی بۆ ئەوە دەگەڕێتەوە.

کاریگەریی و لێکەوتەکان: ئەمڕۆ لە بۆکان لە گردبوونەوەیەکدا کە پارێزگاریش بەشدار بوو، داوای سزای بەردبارانییان بۆ تۆمەتبارانی دۆسیەی نیان کرد.