ترەمپ بڕیاری ڕاگرتنی ناردنی چەک بۆ ئیسرائیل هەڵدەوەشێنێتەوە

ئاڤا نیوز

دۆناڵد ترەمپ، سەرۆکی ئەمریکا، بڕیارێکی جۆ بایدنی سەرۆکی پێشووی ئەمریکا لەبارەی ڕاگرتنی ناردنی چەک بۆ ئیسرائیل، ‌هەڵدەوەشینێتەوە.

وێنە گەورەکە: لە هەفتەکانی کۆتایی سەرۆکایەتییەكەی، جۆ بایدن لە پێناو کەمکردنەوەی ژمارەی قوربانییانی غەززە، بڕیاری ڕاگرتنی ناردنی چەک و بۆمبی بۆ ئیسرائیل دەرکرد، بەڵام دۆناڵد ترەمپ سەرۆکی ئێستای ئەمریکا بڕیارەکەی هەڵوەشاندەوە، بەمەش ناردنی چەک و بۆمب بۆ ئیسرائیل دەستپێدەكاتەوە.

لێدوانی فەرمی: ترەمپ لەنێو بنكەیەكی هێزی ئاسمانیی ئەمریكا بە ڕۆژنامەنووسانی ڕاگەیاند: بڕیاری ڕاگرتنی ناردنی بۆمبی 2000 پاوەندیی بۆ ئیسرائیل هەڵوەشاندۆتەوە، كە بەدەست گەیشتنی ئەو بۆمبانە، ئیسرائیل دەباتە قۆناغێکی پێشكەوتووتر لە بەرەنگاربوونەوەی تیرۆر و پاراستنی هاووڵاتیانی.

ترەمپ ڕوونیشی كردەوە، ڕادەستکردنی ئەو بۆمبانە بە مافی ئیسرائیل دەزانێت چونکە پێشوەختە لە لایەن ئیسرائیلەوە کڕدراون.

ئەوەش بزانە: بۆمبی 2000 پاوەندی، بەهێزترین چەکی  ئەمریکیە بۆ ئیسرائیل، بۆمبەكە كاریگەری زۆری هەیە بۆ تێكشكاندنی تونێلە دوور و درێژەكانی حەماس، هەربۆیە سوپای ئەو وڵاتە جەخت دەکاتەوە لە دەستخستنی.