وەزارەتی پێشمەرگە ڕێنمایی خانەنشینی بڵاودەکاتەوە

ئاڤا نیوز

 

وەزارەتی پێشمەرگە ڕێنماییەکانی خانەنشینی سەربازی بڵاوکردەوە لەبەر ڕۆشنایی بڕیاری ئەنجوومەنی وەزیران و پشتبەست بە بڕیاری دادگای باڵای فیدراڵی تایبەت بە جێبەجێکردنی یاسای خانەنشینی یەکگرتوو.

 

ڕاگەیێنراوی فەرمی: ئێوارەی ئەمڕۆ وەزارەتی پێشمەرگە، ڕێنماییەکانی خانەنشینی سەربازی بڵاوکردەوە، لە ڕێنماییەکەی وەزارەتی پێشمەرگە هاتووە، به پێی فەرمانی وەزاری کە وەزیری پێشمەرگە واژووی لەسەرکردوە و پاڵپشت بەفەرمانی  سەرۆک وەزیران، لەبەر ڕۆشنایی بڕیاری ئەنجوومەنی وەزیران و پشتبەست بە بڕیاری دادگای باڵای فیدراڵی تایبەت بە جێبەجێکردنی یاسای خانەنشینی یەکگرتوو ئەم فەرمانە وەزارییەی بۆ سەرجەم بەڕێوەبەرایەتیی و یەکە سەربازییەکان ناردووە.

 

بەپێی فەرمانەکە ئەفسەران و کارمەندانی وەزارەتی پێشمەرگە، کە ئێستا خانەنشین دەبن بە پێی یاسای ڕاژە و خانەنشینی سەربازی ژمارە(3)ی ساڵی 2010 خانەنشین دەکرێن. دیارە مەبەست لەو یاسایە، یاسای خانەنشینی سەربازی عێراقییە.

 

زانیاریی زیاتر: وردەکاریی یاسای ڕاژە و خانەنشینی سەربازی ژمارە(3)ی ساڵی 2010، بڕگە و ماددەکانی بەم شێوەیەیە:-

 

- خانەنشین بوون هەموو ئەوانە دەگرێتەوە کە پلەدارن و ئەوانەشی بێ پلەی سەربازین.
لە ماددەی 45ـی یاساکە تەمەنی خانەنشینی سەربازی بەمشێوەیە خراوەتەڕوو:

-فەریق ئەوەل و فەریق لە تەمەنی 63 ساڵی خانەنشین دەکرێن.
-لیوا لە تەمەنی 62 ساڵی خانەنشین دەکرێت.
-ئەوانەی پلەی عەمیدیان هەیە لە تەمەنی 60 ساڵی خانەنشین دەبن.
-عەقید لە تەمەنی 57 ساڵی خانەنشین دەکرێت.
-موقەدەم لە تەمەنی 55 ساڵی خانەنشین دەکرێت..
-ڕائید لە تەمەنی 51 ساڵی خانەنشین دەکرێت.
-نەقیب لە تەمەنی 50 ساڵی  خانەنشین دەکرێت.
-ملازم ئەوەل و ملازم لە تەمەنی 50 ساڵی خانەنشین دەکرێت.
-نائیب عەرەیف تا نائیب زابت ئەوانەی هونەرین لە تەمەنی 57 ساڵی خانەنشین دەبن.
-نائیب عەرەیف تا نائیب زابت لە تەمەنی 52 ساڵی خانەنشین دەبن.
-سەرباز و سەربازی پلەی یەک واتا (جوندی و جوندی ئەوەل) لە تەمەنی 50 ساڵی خانەنشین دەبن.
-هەروەها لە یاساکە هاتووە، ئەوانەی ئیمامی دەکەن لەناو هێزە ئەمنییەکان لە تەمەنی 60 ساڵی خانەنشین دەکرێن.

- هەر بەپێی یاساکە ئەگەر وەزیر پێشنیازی بۆ فەرماندەیی گشتی هێزە چەکدارەکان کرد، دەتوانرێت هەریەک لەو پلانەی خرانەڕوو خزمەتی یەک ساڵیان بۆ درێژ بکرێتەوە، ئەویش تەنیا بۆ یەکجارە.

 

-لە بڕگەی پێنجەمی ماددەی 47ـی یاساکە هاتووە، لە دوای چوار ساڵ لەمافی پلە بەرزکردنەوە ئەگەر هەریەک لەو پلانەی سەرەوە پلەکەی بەرز نەکرایەوە، ئەوا بە پلەیەکی بەرزتر ڕەوانەی خانەنشینی دەکرێت.

 

-یاساکە وردەکاریی زۆری تێدایە، بە تایبەت بۆ ئەوانەی نەخۆشن یان لەناو خزمەتی سەربازیدان و توانای بەردوامیان نەماوە.