هەولێر و بەغدا لەبارەی گواستنەوەی مامۆستایانی خوێندنی کوردی لەسەر سێ خاڵ ناکۆکن

ئاڤا نیوز

یەکێتیی مامۆستایانی کوردستان لە کەرکووک فۆڕمێک بەسەر مامۆستایان دابەش دەکات بەمەبەستی گواستنەوەی ڕاژەکانیان بۆ سەر حکومەتی ناوەندی.

چیرۆکی سەرەکی: لقی كەركووكی یەكێتیی مامۆستایانی كوردستان، فۆڕمێكی ئارەزوومەندانە بەسەر مامۆستایان دابەش دەكات تایبەت بە گواستنەوەی ڕاژەكانیان بۆ سەر وەزارەتی پەروەردەی حكومەتی عێراق، بەڕێوەبەری بەشی خوێندنی كوردیش لە كەركووك دەڵێت "ئاگاداری ئەو فۆڕمە نین و بڕیاری لەمجۆرە ڕەزامەندی هەردوو حكومەتی پێویستە".

لێدوانی فەرمی: كامەران عەلی، بەڕێوەبەری بەشی خوێندنی كوردی لە کەرکووک تایبەت بە ئاڤای ڕایگەیاند، نە ئێمە و نە وەزارەتی پەروەردەی هەرێمی كوردستان بەهیچ شێوەیەك ئاگاداری ئەو فۆڕمە نین. ئەگەر شتێکی واش بکرێت ڕەزامەندی هەردوو حكومەتی دەوێت.

پێشتر داواكاریی مامۆستایان بۆ گواستنەوەی ڕاژەكانیان بۆ سەر بەغدا ڕەتكرایەوە و لە پەرلەمانی عێراق دەنگی پێویستی نەهێنا.

لەلایەکی دیکەوە: لقی كەركووكی یەکێتیی مامۆستایانی كوردستان دەڵێت: لەسەر ئاستی هەردوو وەزارەتی پەروەردەی هەرێمی كوردستان و حكومەتی فیدڕاڵی دانیشتن كراوە، بەڵام لەسەر چەند خاڵێك ناكۆكن و نەگەیشتوونەتە ڕێككەوتن، ئەوانیش:

- بەغدا وتوویەتی ئەو مامۆستایەی بۆ سەر میلاكی حكومەتی فیدڕاڵی دەگوازرێنەوە، دەبێت پارەی ساڵانی خزمەتی كە وەك ڕێژەی خانەنشینی لێی بڕاوە، بگەڕێنێتەوە.

- ئەو مامۆستایانەی داوای گواستنەوەی ڕاژەكانیان دەكەن دەبێت بەڵێن بدەن كە گلەیی لە بڕی مووچەكەیان نەكەن لە حاڵەتێك ئەگەر لە مووچەی حكومەتی هەرێمی كوردستان كەمتر بوو.

- هەروەها ئەو گۆڕانكارییەی بەسەر تەمەنی خانەنشیندا هاتووە، خاڵێكی دیكەی ناكۆكییەکانە.