ئاڤا بەدواداچوون بۆ دامەزراندنی وانەبێژانی زانکۆ و پەیمانگەکان دەکات

 

ئاڤا نیوز

بەشێک لە وانەبێژانی زانكۆ و پەیمانگەكانی هەرێمی كوردستان کە کێشە لە بەڵگەنامەکانیان هەبووە، ناویان لە لیستی دامەزراندن بەشێوەی گرێبەست دەرهێنراوە و داوایا لە ئاڤا کردووە بەدواداچوونیان بۆ بکەن.

چیرۆکی سەرەکی: لە ماوەی ڕابردوودا، هاوشێوەی وانەبێژانی پەروەردە، سەرۆكوەزیران مەسرور بارزانی بڕیاری دامەزراندنی مامۆستایانی وانەبێژی زانكۆ و پەیمانگەكانی دا، دوای ئەوەی لیست لە وەزارەتی خوێندنی باڵاوە بۆ ئەنجوومەن نێردرا، بەشێك لە وانەبێژان گرفتی بەڵگەنامە و ناوی دووبارە و هەندێك گرفتی دیكەی تەكنیكییان هەبوو بۆیە ناویان لە لیست دەرهێندرا.

زانیاری بەدەستهاتوو:  ئەو ناوانەی كێشەیان هەبوو كە دەیان وانەبێژن، بە لیستێكی دیكە و بە پاشكۆ ئامادە كرا و ناوەكان لە سەرجەم زانكۆكان كۆكرانەوە، ئاڤا میدیا بەدواداچوونی كردووە بۆ ئەوەی بزانێت كەی ناوی ئەوانیش هاوشێوەی هاوڕێكانیان دەگەڕێتەوە.

لێدوانی فەرمی: د. توانا نەجەفی، بەڕێوەبەری گشتیی دیوانی وەزارەتی خوێندنی باڵا بە ئاڤا میدیای ڕاگەیاند: وردبینیکردن بۆ ناو و بەڵگەنامەكانی سەرجەم ئەو وانەبێژانە لە گشت زانکۆكان تەواو بووە، خەریکە یادداشتی کۆتایی دەدەینەوە وەزیری خویندنی باڵا و توێژینەوەی زانستی تاوەکو پەسەندی بکات و پاشان ڕەوانەی ئەنجوومەنی وەزیران بكرێت.