لە دەربەندیخان بڕیاری قەدەغەکردنی کارکردنی منداڵان دەچێتە بواری جێبەجێکردنەوە

ئاڤا نیوز

 

قایمقامیەتی قەزای دەربەندیخان لەگەڵ لیژنەی ئەمنیی شارەکە چەند بڕیارێکیان دەرکرد، کە تایبەت بوون بە ئارامی ناوچەکە و کاراکردنی بڕیاری قەدەغە کردنی کارکردنی منداڵان لەسەر شەقامەکان و چاودێریکردنی بازاڕەکان.

 

وێنە گەورەکە: لیژنەی ئەمنی قایمقامیەتی قەزای دەربەندیخان چەند بڕیار و رێنماییەکی بۆ ساڵی نوێ دەرکرد، باس لەوە دەکرێت لەپێناو پاراستنی سەرو ماڵی هاووڵاتییان، فرۆشتنی کلێنس و ئاو لەلایەن منداڵان لەسەر شەقامی گشتی و ترافیک لایتەکان قەدەغە دەکرێت.

 

ڕاگەیێنراوی فەرمی: قایمقامیەتی قەزای دەربەندیخان، ڕایگەیاند: لە بڕیارەکانی ئەمڕۆدا لیژنەی هاوبەشی ئاسایش و پۆلیس و پۆلیسی هاتووچۆ و چاودێری قوتابخانەکان، لەکاتی چوون و هاتنەوەی قوتابیان رێگە بە هاتووچۆی ماتۆڕسکیلی بێزارکەر نادرێت، بڕیارەکانی دیکەش ئەمانەن:

 

– جەختکردنەوە لە پاراستنی ئارامی و ئاسایشی هاووڵاتییان.

– کۆتاییهێنان بە دیاردەی فرۆشتنی کلێنس و ئاو لەلایەن منداڵان لەسەر شەقامی گشتیی و ترافیک لایتەکان.

– چاودێریکردنی قوتابخانەکان لەکاتی چوون و هاتنەوەی قوتابییان لەلایەن لیژنەی هاوبەشی ئاسایش و پۆلیس و پۆلیسی هاتووچۆ، بەتایبەت دیاردەی ئۆتۆمبێل و ماتۆڕسکیلی بێزارکەر.

– جەختکرایەوە کە پێویستە لیژنە هاوبەشەکانی قایمقامیەت زیاتر بەدواداچوون بکەن لەکاتی گەڕان و سەردانەکانیاندا بۆ فرۆشگا و مارکێت و نۆرینگە و دەرمانخانەکان، بەمەبەستی زیاتر پاراستنی ئاسایشی ئابووریی و سەلامەتیی هاووڵاتییان.

– لابردنی زێدەڕۆیی سەر شەقامەکان کە لەلایەن دووکاندار و هاووڵاتییانەوە کراوە، بۆ ئەم مەبەستە لیژنەیەکی تایبەت لەلایەن قایمقامی قەزای دەربەندیخانەوە پێکهێنراوە بۆ لابردنی ئەو زێدەڕۆییانە لەسەر هەردوو شەقامی 30 مەتری یەکەم و شەقامی سەرەکی ناوبازاڕ.

– بەشی هاتووچۆی دەربەندیخان هەڵدەستێت بە دانانی پلانی گونجاو بۆ ڕێکخستنی هاتووچۆ لە شەقامەکاندا، هەرجێگەیەک پێویست بێت لە پێناو کەمکردنەوەی قەرەباڵغی سەرشەقام و پاراستنی گیانی هاووڵاتییان، دەتوانێت بیکات بە رێگەی یەک ساید و هەموو لایەک هاوکاریان دەبن.

 

ئەوەی پێویستە بیزانیت: ئەم بڕیارانە دوای ئەوە دێت خەڵکێکی زۆر لە دەنگی ماتۆڕسکیلەکان بیزارن، هاوکات دیاردەی کارکردنی منداڵان لە ترافیک لایتەکان ڕووی لە زیادبوون کردووە و گلەیی لە دووکانداران دەکرێت کە زێدەڕۆیی دەکەن لە هێنانەپێشەوەی کەلوپەلەکانیان بۆ سەرشەقامەکان.