لە سنووری ڕانیە درۆن ئۆتۆمبێلێک بۆردوومان دەکات و کوژراو هەیە

ئاڤا نیوز

دوای نیوەڕۆی ئەمڕۆ لەبەردەم چێشتخانەی گردجان لەسەر ڕێگای گردجان بۆ چوارقوڕنە، بەهۆی بۆردوومانی درۆنەوە، چوار کەس گیانیان لەدەستدا.

وێنە گەورەکە: لەماوەی ڕابردوودا چەندین جار فڕۆکەی بێفڕۆکەوانی تورکیا بۆردوومانی ئۆتۆمبێلی لەم ناوچەیە و ناوچەی دیکەی هەرێمی کوردستان کردووە و بەو هۆیەوە دەیان کەس گیانیان لەدەستداوە.

لێدوانی فەرمی: کامەران عوسمان، بەرپرسی تیمی کوردستانی عێراقی ڕێکخراوی CPTـی ئەمریکی بە ئاڤا میدیای ڕاگەیاند:

- بۆردوومانەکە کاتژمێر 3:20 خولەک بووە، ئەو ئۆتۆمبێلەی کراوەتە ئامانج جۆری میتسیۆبیشی بەرز بووە.

- بەهۆی بۆردوومانەکە چوار کەس گیانیان لەدەستداوە و کەسێکیش بە سەختی بریندار بووە.

- ئەوانەی کوژراون دووانیان پیاو و دووانی دیکەیان ئافرەت بوون و ناسنامەیان نەناسراوەتەوە. هاوکات ماتۆڕسوارێک لەکاتی بۆردوومانەکە لە دوای ئۆتۆمبێلەکە بووە و بریندار بووە، برینەکەی سەختە.

لەلایەکی دیکەوە: دەروون قادر، وتەبێژی پۆلیسی ڕاپەڕین بۆ ئاڤا میدیای پشتڕاستکردەوە کە لە ڕووداوەکەدا چوار کەس گیانیان لەدەستداوە و کەسێکیش برینداربووە.

باکگراوند: بە تەنها ساڵی ڕابردوو لە تەواوی هەرێمی کوردستان بەهۆی بۆردوومانی فڕۆکەکانی تورکیاوە 18 کەس کوژران و پێنج کەسیش بریندار بوونە.