پارێزگاری هەڵەبجە و جێگرەكەی سەرەڕای خانەنشینبوونیان دەسەڵاتی واژۆكردنی مامەڵەكانیان بۆ درێژدەکرێتەوە

ئاڤا نیوز

بڕیاری خانەنشینکردنی ژمارەیەکی زۆر لە مووچەخۆرانی هەرێمی کوردستان بووە هۆی درووستبوونی بۆشایی لە پۆستە ئیدارییەکان، پارێزگار و جێگری پارێزگاری هەڵەبجە بە پێی بڕیارەکە خانەنشین بوون، بەڵام بەپێی بڕیارێکی وەزارەتی ناوخۆ، دەسەڵاتی واژۆکردنیان بۆ ماوەی مانگێک بۆ درێژ کرایەوە.

چیرۆكی سەرەكی: هەریەك لە پارێزگاری هەڵەبجە و جێگرەكەی، بەپێی بڕیاری نوێی وەزارەتی دارایی، لە كۆتایی ساڵی ڕابردووەوە خانەنشین بوونە و هیچ دەسەڵاتێكیان نەماوە، بەڵام بە بڕیارێكی وەزارەتی ناوخۆی هەرێمی كوردستان، تاوەكو 2025-1-31 دەسەڵاتی واژۆكردن و ڕاییكردنی مامەڵە ئیدارییەكانی سنووری پارێزگاكەیان بۆ درێژكراوەتەوە و دوای كۆتاییهاتنی ئەو وادەیەش نازانرێت چارەنووسی وەزیفی و دەسەڵاتە كارگێڕییەكانیان چی بەسەردێت.

زانیاری بەدەستهاتوو: ئازاد تۆفیق، پارێزگاری هەڵەبجە لەدایكبووی ساڵی 1963ـە و ئێستا تەمەنی 62 ساڵە، شاهێن حەمە ڕەزا، جێگری پارێزگاریش، لەدایكبووی 1964ـە و ئێستا تەمەنی 61 ساڵە، بەگوێرەی بڕیارە نوێیەكەی وەزارەتی دارایی كە تەمەنی خانەنشینی بۆ 60 ساڵ كەمكردەوە، هەردووكیان لەڕووی یاساییەوە خانەنشین بوون و لەڕێككەوتی 2024-12-31ـەوە، دەسەڵاتی واژۆكردنی هیچ نووسراوێكیان نەماوە.

ئەوەی پێویستە بیزانیت: بەو پێیەی هەڵەبجە هێشتا بەفەرمی نەبۆتە پارێزگا، پۆستی پارێزگاری هەڵەبجە و جێگرەكەی، پۆستێكی باڵا نییە تا بە تەوافقی سیاسی و بەدەر لە ڕێسا و یاساكانی خزمەتی فەرمانبەری دابنرێت و لە مەرجی تەمەن بەدەر بێت، بەڵكو ئەو كەسەی لەو پۆستە دادەنرێت، هەمان مامەڵەی فەرمانبەرێكی ئاسایی لەگەڵ دەكرێت و هەمان یاسای خانەنشینبوونی فەرمانبەران دەیانگرێتەوە.

لێدوانی فەرمی: شاهێن حەمە ڕەزا، جێگری پارێزگاری هەڵەبجە تایبەت بە ئاڤا ڕایگەیاند، بەپێی بڕیارە نوێیەكەی وەزارەتی دارایی، لە 2024-12-31ـەوە خانەنشین كراوین و هیچ دەسەڵاتێكی ئیداریمان نەماوە، بەڵام بە فەرمانێكی وزاریی وەزارەتی ناوخۆ، دەسەڵاتی ڕاییكردنی مامەڵەكان تاوەكو 2025-1-31 بۆمان درێژكراوەتەوە.

ڕوونیشی كردەوە، هیچ باسوخواسێك بۆ پڕكردنەوەی شوێنەكانیان باس نەكراوە و خۆیشیان چاوەڕێی بڕیاری وەزارەتی ناوخۆی هەرێمی كوردستانن كە چارەنووسیان یەكلابكاتەوە.