فوئاد حوسێن كاتی كۆبوونەوەی هەردوو شاندی هەولێر و بەغدا ئاشكرا دەكات

ئاڤا نیوز

د. فوئاد حوسێن، وەزیری دەرەوەی عێراق، كات و شوێنی كۆبوونەوەی داهاتووی شاندی هەرێمی كوردستان و عێراق لە بەغدا ئاشكرا دەكات.

چیرۆكی سەرەكی: هەفتەیەكە وەزارەتی دارایی عێراق و تیمە تەکنیکییەکانی وەزارەتی دارایی و ئابووریی کوردستان بە هاوبەشی كار دەكەن، بۆ ئامادەكردنی لیستی مووچەی مانگی یەک و لیستی خانەنشینان و تەرازووی پێداچوونەوە (میزان موراجەعە)ی مانگی 12ـی ساڵی ڕابردوو.

زانیاریی تایبەت: ئەمڕۆ ئاڤا میدیا لە زاری سەرچاوەی تایبەتەوە بڵاوی كردەوە كە كۆتایی ئەم هەفتەیە كارەكانی هەردوو تیمی وەزارەتی دارایی هەرێمی كوردستان و عێراق تەواو دەبێت، ئەگەر هیچ کێشەیەک ڕوونەدات، ئێوارەی ڕۆژی شەممە 1-2-2025، شاندی باڵای کوردستان دەچێتەوە بەغدا و لەگەڵ ئەنجوومەنی ئابووریی عێراق و تەیف سامی، وەزیری دارایی کۆدەبنەوە، بەڵام بەپێی وتەی وەزیری دەرەوەی عێراق كۆبوونەوەكە ڕۆژی هەینی دەكرێت.

لێدوانی فەرمی: د. فوئاد حوسێن لە پانێلێكدا لە بەغدای پایتەخت ڕایگەیاند: ڕۆژی هەینیی داهاتوو کۆبوونەوەی شاندی هەولێر و بەغدا لە ماڵی من دەكرێت.

لەلایەكی دیكەوە: سەبارەت بە دەستپێکردنەوەی هەناردەی نەوەتی هەرێمی کوردستان، فوئاد حوسێن ڕایگەیاند: رێککەوتنی نێوان هەرێمی كوردستان و کۆمپانیاکانی بەرهەمهێنان و حکومەتی بەغدا هەیە، بەڵام لە پەرلەمان کێشەی بۆ دروست کرا، لە داهاتوویەكی نزیکدا سەرۆکوەزیرانی عێراق لەگەڵ سەرۆکی فراکسیۆنەکان کۆدەبێتەوە، تاوەکو ڕێگاچارەیەکی بۆ بدۆزرێتەوە.

ئەوەی پێویستە بیزانیت: شاندی هەرێمی كوردستان لەگەڵ خۆیان لیستەکانی مووچە و خانەنشینی دەبەن بۆ بەغدا و گفتوگۆ لەبارەی ڕێککەوتنێکی نوێ دەکەن بۆ خەرجکردنی مووچەی ئەمساڵی مووچەخۆران و شایستە داراییەكانی خەڵكی كوردستان.