مەزڵووم عەبدى: لە هەوڵداین بۆ پێکهێنانى دەستەیەکى یەکگرتوو بەناوى رۆژئاوا

ئاڤا نیوز

 

فەرماندەی گشتیی هێزەکانی سووریای دیموکرات جەخت لەوە دەکاتەوە، ئامانج لە سەردانەکەیان بۆ لای سەرۆک بارزانی، یەکخستنی هەڵوێستی کورد بوو، دەشڵێت: لە هەوڵداین بۆ پێکهێنانى دەستەیەکى یەکگرتوو بەناوى رۆژئاوا.

 

وێنە گەورەکە: مەزڵووم عەبدى، فەرماندەى گشتى هێزەکانى سوریاى دیموکرات (هەسەدە) لە چاوپێکەوتنێکێ نوێ دا، جەخت لە یەکڕیزی کورد لە ڕۆژاوای کوردستان دەکاتەوە تا بەیەک پاکێج بچنە دیمەشق.

 

لێدوانی فەرمی: مەزڵووم عەبدی لە چاوپێکەوتنێکی ڕۆژنامەوانیدا ڕایگەیاند: سووریا لەبەردەم ئاڵنگارییەکى گەورە و گۆڕانکارییەکی مێژووی دایە لەبەر ئەوەی تا ئێستا وێنەیەکى ڕوون لە داهاتووى سووریا دیار نییە.

 

سەبارەت بە سەردانەکەی بۆ هەرێمی کوردستان و کۆبوونەوەی لەگەڵ سەرۆک بارزانی؛ مەزڵووم عەبدی دەڵێت: "ئامانج لە سەردانەکەیان بۆ هەولێر یەکخستنی هەڵوێستی کورد بوو، بۆ دانوستان لەگەڵ دیمەشق، لە چەند ڕۆژی داهاتوودا لەگەڵ هێز و لایەنە کوردییەکان کۆدەبنەوە بۆ ئەوەی بەیەک تیم سەردانی دیمەشق بکەن."

 

جەختیش لەوە دەکاتەوە کە پەیوەندییان راستەوخۆ لەگەڵ ئەحمەد شەرع هەیە و هیچ پێکدادانیان لەگەڵ دەستەى تەحریرولشام نییە و لەگەڵ ئیدارەى نوێشدا تایبەت بە داهاتوەی هەسەدە گەیشتوونەتە خاڵى هاوبەش.

 

قوڵتر: عەبدى لەبارەى هێرشە بەردەوامەکانى تورکیا بۆ سەر رۆژئاواى کوردستان دەڵێت، هێرشەکان دەبنە بەربەست بۆ بنیاتنانەوەى سووریای نوێ و دیالۆگە سیاسییەکانیش پەک دەخات و ئاشکراشی دەکات، بەردەوامن لە بەرگریکردن لە پردی قەرەقۆزاق و بەنداوى تشرین و لەگەڵ ئەمریکاش لە هەوڵدایە بۆ راگەیاندنى ئاگربەست، بەڵام پێویستە نێوەندگیریی زیاتریش بکرێت.