لە سلێمانی دەستگیرکردنی پێنج داعش ڕاگەیێنرا

ئاڤا نیوز

بەرێوەبەرایەتی گشتی ئۆپەراسیۆنەکانی ئاسایش ڕایگەیاند, لە سێ ئۆپراسیۆندا لە دەوروبەری سلێمانی توانیان پێنج تیرۆریستی داعش دەستگیربکەن.

 

چیرۆکی سەرەکی: لە ماوەی ڕۆژانی 19-23-26ـی 1ـی 2025 بەڕێوەبەرایەتی گشتی ئۆپەراسیۆنەکانی ئاسایش بەهەماهەنگی دەزگای ئاسایشی نیشتمانیی عێراق لە چەند ئۆپراسیۆنێکدا، لەسەر بنەمای زانیاریی هەواڵگریی، بە بڕیاری دادوەری لێکۆڵینەوەی ئاسایش، دوای بەدواداچوون و کۆکردنەوەی زانیاریی ورد و دەستنیشانکردنی شوێنی تیرۆریستان، توانرا پێنج تیرۆریستی داعش لە دەوروبەری سلێمانی دەستگیربکەن بەناوەکانی (ص ث ع)،(و ا ر)،(ص س ص)،(م ع ح)،(خ ب ع)، کە سەرجەمیان داواکراوی دادگاکانی عێراق بوون.

 

زانیاریی زیاتر:  بەگوێرەی ڕاگەیێنراوەکەی بەرێوەبەرایەتی گشتی ئۆپەراسیۆنەکانی ئاسایش، ئەو سێ تیرۆرستە بەمەبەستی خۆحەشاردان ڕوویان لە دەورووبەری سلێمانی کردبوو، کە لەماوەی ڕابردوودا چەندین خولی شەرعی و سەربازییان بینیوە.

 

ئەوەی پێویستە بیزانیت: لە ئێستادا تۆمەتباران بەماددەی چواری تیرۆر راگیراون و ڕووبەرووی یاساکراونەتەوە و لێکۆڵینەوە لە دۆسیەکانیان بەردەوامە.