لە هەرێمی كوردستان دامەزراندن دەستپێدەكاتەوە

ئاڤا نیوز

نزیكەی 15 ساڵە پرۆسەی دامەزراندنی هەمیشەیی لە حكومەتی هەرێمی كوردستان وەستاوە، بەپێی زانیارییەكانی ئەنجوومەنی ڕاژە 100 هەزار دەرچووی كۆلێژ و پەیمانگە هەن كە دانەمەزراون، لە داهاتوویەكی نزیكیشدا پرۆسەكە دەستپێدەكاتەوە.

لێدوانی فەرمی: سیراج بارزانی، سەرۆکی ئەنجوومەنی ڕاژەی گشتیی هەرێمی كوردستان ڕایگەیاند:

- ئێستا سەرقاڵی دانانی بەردی بناغەی سیستەمێكی داتابەیسی پێشکەوتووین بەمەبەستی ڕێکخستنەوەی ڕاژەی گشتی، دامەزراندنی نوێ و پلەبەرزکردنەوە، لە سیستەمەكەدا دۆسیەی کەسیی فەرمانبەران بە دیجیتاڵی دەكرێت، ئەوەش ئامرازێکی گرنگی کۆنتڕۆڵکردنی کاروباری فەرمانبەران و دووبارە ڕێکخستنەوەی میلاکاتی وەزارەتەکانە.

- بەگوێرەی پێویستی، ئەنجومەنی ڕاژەی گشتی، دەسەڵاتی پێدراوە پڕۆسەی دامەزراندن و پلەبەرزکردنەوە بەڕێوە ببەین، ئەمانە بە دەق لە یاسادا هاتوون و هەمووی لەسەر ئەو پێوەر و بنەما یاساییانەیە کە لە پەرلەمانی عێراق دەرچوون.

- هەوڵ دەدەین لەسەر بنەمای ئەو یاسایە میلاکاتی وەزارەتەکان دەستنیشان بكەین ئەوەش بە هاوكاری لەگەڵ وەزارەتی دارایی و ئابووری، بۆ ئەوەی بتوانین بەشێوەیەکی زانستی لەسەر بنەمای یاساکان دووبارە پرۆسەی دامەزراندن بگەڕێتەوە سەر ڕێڕەوی ڕاستی خۆی، کە هێنانی فەرمانبەرە بۆ ناو کەرتی گشتی لەسەر بنەمای زانستی، پسپۆڕی و توانا.

ئەوەی پێویستە بیزانیت: بەپێی ئەو داتایانەی لە ئەنجوومەنی ڕاژە تۆمار كراون، ئێستا زیاتر لە 100 هەزار دەرچووی كۆلێژ و پەیمانگەی دانەمەزرا و لە هەرێمی كوردستان هەن، ئەنجوومەنی ڕاژە دەیەوێت ناوی سەرجەم ئەو كەسانە تۆمار بكات كە خواستی دامەزراندنیان هەیە، دواتر بەپێی پێویستی و هەلی كاری وەزارەتەكان لەڕێگەی ئیمەیڵەوە داواكار ئاگادار بكرێتەوە بۆ ئەوەی دەست بە مامەڵەی دامەزراندن بكات.

ئەمەش بزانە: ئەنجوومەنی ڕاژە مەبەستیەتی دادپەروەری لە دامەزراندن هەبێت و لێهاتوویی و توانا و پسپۆری تاكە بنەمای دامەزراندن بێت.