شاندی دەم پارتی ناوەڕۆکی دووەم کۆبوونەوەی لەگەڵ ئۆجەلان ئاشکرا دەکات

ئاڤا نیوز

هاوسەرۆکی دەم پارتی لە کۆبوونەوەی فراکسیۆنی حزبەکەی ناوەرۆکی کۆبوونەوەی دووەمی شاندی دەم پارتی لەگەڵ عەبدوڵڵا ئۆجەلان ئاشکرا کرد. 

وێنە گەورەکە: هەوڵەکان لەبارەی پرسی ئاشتی لە تورکیا بەردەوامە، لە چەند ڕۆژی ڕابردوو شاندی دەم پارتی بۆ دووەم جار سەردانی ئیمرالی کرد و لەگەڵ عەبدوڵڵا ئۆجەلان، ڕێبەری پەکەکە کۆبووەوە. هاوکات شاندەکە ناوەڕۆکی کۆبوونەوەکەیان ئاشکرا کرد.

لێدوانی فەرمی: تولای حاتەم ئۆغۆللاری، هاوسەرۆکی دەم پارتی ڕایگەیاند:

- ئۆجەڵان لەدووەمین دیداریدا لەگەڵ شاندی ئیمرالی وتی، "ئێمە بە قۆناغێکی مێژووییدا تێدەپەڕین کە قەیرانە جیهانی و نیشتمانییەکان تێکهەڵکێش دەبن، ڕاکێشانی تورکیا بۆ سەر ڕێچکەی دیموکراسی تاکە ڕێگەیە بۆ پاراستنی لە قەیرانەکان".

- ئۆجەلان ڕاشیگەیاندووە، بانگەوازەکەی باخچەلی ئەگەر لەگەڵ عەقڵی دەوڵەت تێکەڵ بکرێت، دەبێتە هۆی پێشکەوتنێکی مێژوویی کە خزمەت بەئاشتی دەکات.

- ئۆجەلان پێشیوایە لەم قۆناغەدا کە قەیرانەکان کەڵەکە و تێکهەڵکێش بوون، پەنابردن بۆ سیاسەتی بەڕێکردنی کات ‌و چاوەڕوانی سەبارەت بە چارەسەری پرسی کورد و دیموکراتیزەکردنی تورکیا، خزمەت بە تورکیا ناکات.

لەلایەکی دیکەوە: ئۆجەلان جارێکی دیکە لەم دیدارەدا جەختی لەوە کردەوە کە ئامانجی ئەوەیە ئەو پرسە لەزەمینەی توندوتیژی و ململانێیەوە بگوازێتەوە بۆ زەمینەی یاسای دیموکراسی و سیاسەتی دیموکراسی.

ئەوەی پێویستە بیزانیت: هەندێک ڕاپۆرتی ڕۆژنامەوانی ئاماژە بەوە دەکەن کە ئۆجەلان لە 15 ی شوباتدا پەیامێک بڵاودەکاتەوە و ڕاستەوخۆ باس لە دۆخی ناوچەکە و تورکیا دەکات.