ناوەڕۆکی دووەم کۆبوونەوەی ئەنەکەسە و مەزڵووم عەبدی: بە یەک شاند دەچینە دیمەشق

ئاڤا نیوز

ئەنجوومەنی سەركردایەتیی ئەنەكەسە و مەزڵووم عەبدی، فەرماندەی گشتیی هێزەكانی سووریای دیموكرات (هەسەدە) بۆ دووەمجار كۆبوونەوە، سەركردەیەكی ئەنەكەسەش ناوەڕۆكی كۆبوونەوەكە ئاشكرا دەكات.

لێدوانی فەرمی: سلێمان ئۆسۆ، ئەندامی سەركردایەتیی ئەنەكەسە بە ئاڤا میدیای ڕاگەیاند: كۆبوونەوەی ئەمڕۆمان لەگەڵ مەزڵووم عەبدی زۆر ئەرێنی بوو و هەردوولا گەیشتینە ئەو ڕێككەوتنەی کە بەزووترین كات دەبێت بۆچوون و بەرنامە و گوتاری هاوبەشمان هەبێت، دواتر لیژنەیەكی هاوبەش بۆ گفتوگۆ لەگەڵ ئیدارەی تازەی سووریا پێكبهێنین و دەست بە گفتوگۆكان بكرێت.

بۆچوونی لایەنی بەرامبەر: لای خۆیەوە مەزڵووم عەبدی دوای کۆبوونەوەکە ڕایگەیاند: بە یەکدەنگی و وەک یەک تیم سەردانی دیمەشق دەکەین.

ئەوەی پێویستە بیزانیت: كۆبوونەوەی ئاستی باڵای نێوان ئەنەكەسە و هەسەدە لەدوای دەستپێشخەریی سەرۆك بارزانی دێت سەبارەت بە یەكگرتوویی لایەنە كوردییەكانی ڕۆژئاوای كوردستان و بۆ داهاتووی كورد لەو پارچەیەی كوردستان و گفتوگۆ لەگەڵ ئیدارەی تازەی سووریا.