لە فێستیڤاڵێکی ئایینیی هیندۆسەکان بەهۆی پاڵەپەستۆ 40 کەس گیانیان لەدەستدا

ئاڤا نیوز

 

لە فێستیڤاڵی گەورەی ئایینی هیندۆسەکان لە هیندستان بەهۆی دروستبوونی قەرەباڵخی و شێلانەوە نزیکەی 40 کەس گیانیان لەدەست دا و ژمارەیەکی دیکەش برینداربوون.

 

ئەوەی پێویستە بیزانیت: فێستیڤاڵی کومب مێلا مەراسیمێکی گەورەی ئایینیە لە ویلایەتی ئۆتار پرادێش لە باکووری هیندستان و لە کەناری ڕووباری گەنجس بەڕێوەدەچێت. ئەم فێستیڤاڵە شەش هەفتەییە گەورەترین فێستیڤاڵە لە ساڵنامەی ئایینی هیندۆسەکان و ساڵانە لەمکاتەدا بە ملیۆنان کەس بەشداری تێدا دەکەن.

چی ڕوویدا: ڕووداوەکە کاتێک ڕوویداوە بەشێک لە بەشداربووانی فێستیڤاڵەکە لە کەناری ڕووبارەکەدا خەوتوون، لەو کاتەشدا بە هەزاران بەشداربووی دیکە هەوڵیان داوە بگەنە ڕووبارەکە بۆ ئەوەی خۆیان لەناو ئاوی ڕووبارەکە پاک بکەنەوە کە لەلایەن هیندۆسەکانە  بە ئاوێکی پیرۆز دادەنرێت، بەڵام بەهۆی ئەوەوە پاڵەپەستۆ و قەرەباڵخی دروست بووە و 40 کەس گیانیان لەدەست داوە و ژمارەیەکیش برینداربوون.

 

زانیاریی زیاتر: بەگوێرەی میدیاکانی هیندستان، لە فێستیڤاڵەکەی ئەمساڵدا  لەسەرەتاوە تاوەکو ئێستا نزیکەی 200 ملیۆن کەس بەشدارییان کردووە.

 

ئەوەی لەبارەیەوە دەگوترێت: لایەنەکانی ئۆپۆزسیۆن خراپی بەڕێوەبردنی فێستیڤاڵەکە لەلایەن لایەنە پەیوەندیدارەکانی ناوچەکە بەهۆکاری کارەساتەکە دەزانن.