کۆشکی سپی، بایدن بە لەناوبردنی 100 ملیۆن مریشک تۆمەتبار دەکات

ئاڤا نیوز

لە ئەمریکا قەیرانی هێلکە دەستی پێکردووە، کۆشکی سپیش بایدن تۆمەتبار دەکات بە لەناوبردنی 100 ملیۆن مریشک.

وێنە گەورەکە: لە ئەمریکا هێلکە لە گرانترین نرخی خۆی دایە لە ماوەی چەند ساڵی ڕابردوودا، بەشێوەیەک نرخی یەک هێلکە گەیشتووەتە 4 دۆلار، هاووڵاتیانی ئەمریکا گلەیی لە ئیدارەی ترەمپ دەکەن و دەڵێن ترەمپ بەڵێنیدا لە یەکەم ڕۆژی دەستبەکاربوونی هەڵئاوسان کەم دەکاتەوە سەردەمی زێڕین لە ئەمریکا دەست پێدەکات، بەڵام ئەمە ڕۆژی شەشەمە لە دەستبەکاربوونی و نرخی هێلکە لە بەرزترین ئاستی دایە.

ئەوەی پێویستە بیزانیت:  ئیدارەی ترەمپ، بایدن تۆمەتبار دەکات لە بەرزبوونەوەی نرخی هێلکە لە ئەمریکا.

لێدوانی فەرمی: کارۆلین لیڤیت، سکرتێری ڕۆژنامەوانی کۆشکی سپی ڕایگەیاند: نرخی هێلکە و هەندێک کاڵای دیکە بەهۆی ئیدارەی بایدنەوە بەرزبووەوە، لەبەرئەوەی لە ساڵی 2024 کاتێک بایدن لە ئۆفیسەکەی خەوتبوو، نرخی هێلکە بەشێوەیەکی بەرچاو بەرزبووەوە، بەمەش بایدن تۆمەتبارە بە لەناو بردنی  100 ملیۆن مریشک و کەمبوونەوەی هێلکە و گرانبوونی نرخی.