داواكاری گشتی سەرووی هەزار سكاڵا لە دژی بەفیڕۆدانی موڵكی گشتی بەرز دەکاتەوە

ئاڤا نیوز

دەزگای داواكاری گشتیی هەرێمی كوردستان لە ماوەی ساڵێكدا زیاتر لە هەزار سكاڵای لە بارەی مافی گشتی و بەفیڕۆدانی موڵكی گشتی و لابردنی زێدەڕۆییەكان بەرزكردۆتەوە، و سێ هەزار و 907 نووسراوی بەدواداچوونی ئاراستەی دامودەزگا پەیوەندیدارەكان كردووە.

وێنە گەورەكە: سەرۆكایەتیی داواكاری گشتیی هەرێمی كوردستان، وەك دەزگایێكی چاودێر بەسەر پەیڕەوكردنی بنەمای سەروەریی یاسا و بەدواداچوونی پێشێلكارییە یاساییەكان، ئاماری كار و چالاكییەكانی ساڵێكی بڵاوكردەوە، ژمارەكان دەڵێن ڕۆڵی سەرەكی هەبووە لە سنوورداركردنی بەفیڕۆدانی موڵكی گشتی و لابردنی زێدەڕۆیی لە ناوچە جیا جیاكانی هەرێمی كوردستان.

ڕاگەیێنراوی فەرمی: یەكەی ڕاگەیاندن و پەیوەندییەكانی سەرۆكایەتیی داواكاری گشتی وێنەیەك لە كار و چالاكییەكانی تایبەت بۆ ئاڤا میدیا ڕەوانەكردووە و تێیدا هاتووە:

- ئەندامانی داواكاری گشتی دووهەزار و 31 جار بەشداری لیژنەكانی لێكۆڵینەوە و بەرزەفتكردنیان كردووە.

- سێ هەزار و 907 نووسراوی بەدواداچوون ئاراستەی دامودەزگا پەیوەندیدارەکان کراون.

- زياتر له‌ هەزار دۆسیەی تاوان یەکلايى کراونەتەوە.

- هەزار و 74 سکاڵای لەبارەی مافی گشتی و بەفیڕۆدانی موڵک و ماڵی گشتی و لابردنی زێدەڕۆییەکان بەرزکردووه‌تەوە.

زانیاریی زیاتر: هاوکات هەر یەک لە دەستەكانى تاوانەکان، تاوانی نەوجەوانان و تانەلێدان لە بەرژه‌وەنديی یاسا و دەستەی ڕاوێژکاری لە سەرۆکایەتيی داواکاری گشتی لە ماوەی ساڵێکدا؛ لە کۆی هه‌زار و 275 دۆسیەی تاوانەکان، کە لە دادگاکانی هەرێمی کوردستانەوە ڕەوانە کراون، زياتر له‌ هەزار دۆسیەی تاوان یەکلايى کراونەتەوە، واتە ڕێژەی خێرا ڕاپەراندنی کارەکان زيتر له‌ 80% بووە.

قووڵتر: ئەندامانی داواکاری گشتی بە مەبەستی ئاگاداربوون لە دۆسیەکانی لێکۆڵینەوە و چۆنیيەتی بەڕێوەچوونی ڕێکارەکان بەگوێرەی یاسا و بەدواداچوون بۆ کەموکوڕییەکان؛

- لە ماوەی ساڵێکدا هەزار و 211 جار سەردانی بنکەكانی پۆلیس، ئاسایش، بەڕێوەبەرایەتییەکانی پۆلیس و ئاسایش و بنکەکانی بەرەنگاربوونەوەی توندوتیژيی خێزانی کردووە و سەرپێچییەکان تۆمارکراون و بەدواداچوونیان بۆ کراوە.

- هەر لەو ماوه‌ دیاریکراوه‌دا ئەندامانی داواکاری گشتی ڕۆژانە سەردانی گرتووخانەکانیان کردووە لە بەڕێوەبەرایەتییەکانی چاکسازی بۆ بەدواداچوونی ڕەوشی ڕاگیراوان و حکومدراوان و گوێگرتن لە داواکاری و ئاگا‌داربوون لە کەموکوڕییەکانیان.