ئاڤا میدیا بەدواداچوون بۆ موڵکەکانی وەزارەتی ئەوقاف دەکات

ئاڤا نیوز

دەنگۆیەک لەبارەی فرۆشتنی موڵکەکانی وەزارەتی ئەوقاف لە شاری هەولێر بڵاوبووەتەوە، بەڕێوبەری ئەوقافی هەولێریش دەنگۆکە ڕەت دەکاتەوە. ئاڤا میدیا بەدواداچوون بۆ ئەم بابەتە دەکات.

وێنە گەورەکە: وەزارەتی ئەوقاف، لەگەڕەکی خانەقای هەولێر، خاوەنی 28 دوکان و گەراجێک و خانوویەکە لەسەر پارچە زەوییەک.

ئەوەی لەوبارەیەوە دەگوترێت: ئێستا دەنگۆیەک بڵاو بووەتەوە، گوایە وەزارەتی ئەوقاف ئەو زەوییانە دەفرۆشێت و دەبێت دوکاندارەکان و ئەو خێزانەیش کە لەناو خانووەکەدایە چۆڵی بکەن.

ئەوەی پێویستە بیزانیت: ئەم 28 دوکانە ساڵانە یەکی ملیۆنێک دیناریان وەکو کرێ لە خاوەنەکانیان وەردەگیرێ، لەکاتێکا دووکانی دیکە هەر لەو نزیکانەدا هەن، کرێی مانگانەیان 500 هەزاردینارە.

لێدوانی فەرمی: نەبەز ئیسماعیل، بەرێوبەری ئەوقافی هەولێر دەڵێت:

- ئەم دەنگۆیانە ڕاست نین و بە هیچ شێوەیەک ئەو دووکاندارانەمان ئاگادار نەکردووەتەوە کە دوکانەکانیان چۆڵ بکەن، لەکاتێکدا ئەوە مافی وەزارەتی ئەوقافە و لەڕووی یاساییشە ماف بە ئێمەیە.

- هەندێک لە دووکاندارەکان سەرەڕای ئەوەی کرێیەکی کەمیان بۆ دیاریکراوە، ئەو کرێیە کەمەش نادەن.

ئەمەش بزانە: گەڕەکی خانەقا لەناوجەرگەی شاری هەولێرە و یەکێکە لە دێرینترین گەڕەکەکانی هەولێر.