لیژنەی فەتوا: دانانی مەرجی غەرامە لە کاتی پەشیمانبوونەوە لە مامەڵەکان دروست نییە

ئاڤا نیوز

 

ئەنجوومەنی باڵای فەتوای هەرێمی کوردستان ڕایدەگەیێنێ، دانانی مەرجی غەرامە لەکاتی پەشیمانبوونەوە لە مامەڵەکان دروست نییە و حەرامە.

 
وێنە گەورەکە: لە هەرێمی کوردستان بووەتە نەریت بەتایبەت لە نووسینگەکانی فرۆشتنی ئۆتۆمبێل و نووسینگەکانی عەقارات و فرۆشتنی خانووبەرە، لە کاتی نووسینی هەر مامەڵەیەک و گرێبەستێکی فرۆشتنی ماڵ و موڵک یان ئۆتۆمبێل لەو نووسینگانە مه‌رجی ئه‌وه‌ ده‌نووسرێت ئەگەر هه‌ر یه‌كێك له‌ كڕیار یان فرۆشیار په‌شیمان بێته‌وه‌ ده‌بێت بڕێك پاره‌ بدات به‌ لایه‌نی به‌رامبه‌ری.

 

لێدوانی فەرمی: ئەنجوومەنی باڵای فەتوای هەرێمی کوردستان لەبارەی دروستی ئەو مامەڵانە لە ئیسلامدا، دەڵێت، " ئەو مامەڵانە حەرامن."

 

ئەوەی پێویستە بیزانیت: سەبارەت بەوەی ئەگەر هه‌ردوو لایه‌ن دوای په‌شیمان بوونه‌وه‌ به ‌ڕه‌زامه‌ندی خۆیان ئه‌و بڕه‌ پاره‌یه‌ بدەنە‌ به‌رامبه‌ره‌كه‌یان، ئەمەشیان هەر حەرامە؟ ئەنجوومەنی فەتوا بۆ وەڵامی ئەم پرسیارەیان دەڵێت: ئه‌گه‌ر لایه‌نێك سوور بوو له‌سه‌ر ڕاییکردنی مامه‌ڵه‌كه‌، یانی لەکۆڵ بوونەوە، ئەوا بۆ وه‌رگرتنی ئه‌وه‌ بڕه‌ پاره‌‌ ده‌رچه‌ی شه‌رعی ئه‌وه‌یه‌ کە سه‌ر له‌نوێ كڕیاره‌كه‌ به‌ فرۆشیاره‌كه‌ی بفرۆشێته‌وه‌ به‌كه‌متر یان زیاتر‌.

 

زانیاریی زیاتر: لەبارەی کرێی نووسینگەش، کە لەناو خەڵکا پێی ئەڵێن "دەڵاڵی"،  ئەنجوومەنی فەتوا بۆ ئەوەش ئاوا وەڵامی هەیە و دەڵێت: له كاتی په‌شیمانبوونه‌وه‌ی كڕیار یان فرۆشیار و قبووڵكردنی په‌شیمانبوونه‌وه‌كه،‌ دروسته‌ نووسینگه‌كه‌ كرێی ده‌ڵاڵی خۆی وه‌ربگرێت، مه‌گه‌ر په‌شیمانبوونه‌وه‌كه‌ له‌ مه‌جلیسی مامه‌ڵه‌كه‌دا بێت یان مه‌رجی په‌شیمانبوونه‌وه‌یان له‌ نێوانیاندا دیاریكردبوو، به‌ كه‌متر له‌ سێ ڕۆژ په‌شیمانبوونه‌وەش‌ له‌و كاته‌دا نابێت كرێی ده‌ڵاڵی وه‌ربگیرێت.