داوا لە عێراق دەکرێت چیتر لە کەرتی وزە پشت بە ئێران نەبەستێت

ئاڤا نیوز

ئەندامێکی پارتی کۆماریییەکان هێرش دەکاتە سەر ئیدارەی پێشووی ئەمریکا و جۆ بایدن بەهۆی ئەو سیاسەتەی کە لە ماوەی چەند ساڵی ڕابردوودا لە بەرامبەر عێراق و ئێران بەکاریهێناوە.

وێنە گەورەکە: ئەمریکا گوشار دەخاتە سەر عێراق وەک دووەم گەورەترین بەرهەمهێنەری نەوت لە ئۆپێک، بۆ ئەوەی پشتبەستن بە گازی ئێران کەمبکاتەوە.

بڵاوکراوەی فەرمی: جۆ ویلسۆن، ئەندامی پارتی کۆمارییەکان لە پۆستێکی لە تۆڕی ئێکس نووسیویەتی:

- عێراق بەردەوامە لە ناردنی 10 ملیار دۆلار بۆ ئێران بۆ کڕینی نەوت و کارەبا، لە دەرئەنجامی لێخۆشبوونی ئەمریکا.

- جۆ ویلسۆن، پێیوایە "ئەم لێخۆشبوونەی (ئەمریکا) وادەکات ڕژێم لە تاران بەهێزتر بکات و عێراقیش لەژێر کاریگەریی هەژموونی ئێران بهێڵێتەوە".

- جەختیش لەسەر پێویستی هەڵوەشاندنەوەی ئەم لێخۆشبوونەی ئەمریکای کردووە، بۆ ئەوەی عێراق وزە لە جیهانی عەرەبی بە دەست بهێنێت و دەشڵێ: "ترەمپ ئەم دۆخە ڕاست دەکاتەوە".

ئەوەی پێویستە بیزانیت: ڕۆژی 29-1-2025، زیاد عەلی فازل، وەزیری کارەبای عێراق، لە میانی کۆنفرانسی وزەی عێراق لە بەغدا  ڕایگەیاند: یەکێک لە گەورەترین ئاستەنگەکانی بەردەم وەزارەتەکەیان بۆ دابینکردنی وزەی کارەبا، نەبوونی بڕی پێویستی سووتەمەنییە بۆ بەگەڕخستنی وێستگەکانی بەرهەمهێنانی کارەبا و ڕاشیگەیاند: ئێستا سەختە دەستبەرداری ئەو گازەبن کە لە ئێرانەوە هاوردە دەکرێت و لە ڕێگەیەوە نزیکەی 8 هەزار مێگاوات کارەبا بەرهەم دەهێنن.

ئەمەش بزانە: بۆ دۆزینەوەی هێڵێکی ئەڵتەرناتیڤ، عێراق لە مانگی ئابی 2023 واژۆکردنی ڕێککەوتنێکی سەرەتایی لەگەڵ تورکمانستان بۆ هاوردەکردنی غاز بە مەبەستی پڕکردنەوەی بەشێک لەپێداویستییەکانی وێستگەکانی وزەی کارەبا لە وڵاتدا ڕاگەیاند.