خانمێكی كورد بۆ پۆستی قایمقامی شاری بێڵیڤیوی ئەمریكا بەربژێرە

ئاڤا نیوز

خانمێكی كوردی دانیشتووی ئەمریكا بۆ پۆستی قایمقامی شارێكی ویلایەتی واشنتن بەربژێرە و بە بەرزكردنەوەی دروشمی عەقارات بە نرخی گونجاوتر و پاڵپشتیكردنی كۆمپانیا لۆكاڵییەكانی ویلایەتەكەی، خەونی سەركەوتنی هەیە.

ئەوەی پێویستە بیزانیت: نارین بڕیار، خانمێكی كوردە لە هەڵەبجە لەدایكبووە و هەر لە منداڵییەوە لە ئەمریكا دەژی، ئێستا بۆ پۆستی قایمقامی شاری ویلایەتی واشنتۆن بەربژێرە.

لێدوانی فەرمی: نارین لە ئەكاونتی فەرمی خۆی ڕاگەیاند:

- ئامانجمە ببم بە قایمقامی شاری بێڵیڤیو، بۆئەوەی نرخی زەویوزار و خانوو لەو شارە گونجاو بێت و هانی وەبەرهێنانی ناوخۆیی دەدەم و پاڵپشتی كۆمپانیا لۆكاڵییەكان دەكەم.

- دركم بەوە كردووە كە بڕیارە حكومییەكان چەند كاریگەریی قووڵیان بەسەر ژیانی خەڵك و دەستەبەركردنی خۆشگوزەرانی هەیە، بە تەواوی ئەوە فێربووم بە سەركردایەتی بەواتای هەڵگرتنی بەرپرسیاریەتیی ڕەوشتی دێت لەپێناو بەرگریكردن لە خەڵك و بەرزكردنەوەی توانای لێهاتوویی تاكەكان.

ئەمەش بزانە: ئەو شارەی نارین خۆی تێدا كاندید كردووە، چەندین كەسایەتی ناوداری هاوشێوەی (بیڵ گەیتس) خاوەنی مایكرۆسۆفت و (جێف بیزۆس) سەرمایەداری جیهانی و خاوەنی ئەمازۆن لێی دەژین.