لە ئەمڕۆوە ڕێگە بە گواستنەوەی مریشك لەنێوان شارەكانی هەرێمی كوردستان دەدرێت

ئاڤا نیوز

بۆ چارەسەركردنی ئەو گوشارە زۆرەی لەسەر كێڵگە پەلەوەرییەكان و پڕۆژەكانی بەخێوكردنی مریشك لە هەرێمی كوردستان دروست بووە، وەزارەتی كشتوكاڵ بڕیار دەدات لەمەودوا ڕێگە بە گواستنەوەی مریشك لەنێوان شارەكان بدرێت.

بۆچی گرنگە: بەپێی گوتەی خاوەنی كێڵگە پەلەوەرییەكان ڕێگەگرتن لە گواستنەوە و هێنان و بردنی مریشكی زیندوو لەنێوان شارەكانی هەرێمی كوردستان بەتایبەت لەنێوان پارێزگاكانی هەولێر و دهۆك زیانی پێگەیاندوون و گرفتی نایەكسانیی لە دابەشكردنی بەرهەمەكە دروست كردووە و بڕیارەكەی وەزارەتی كشتوكاڵ ئەم گرفتەیان چارەسەر دەكات.

چیرۆكی سەرەكی: بە بڕیاری وەزارەتی كشتوكاڵی حكومەتی هەرێمی كوردستان، ماوەیەك ڕێگە بە گواستنەوەی بەرهەمە پەلەوەرییەكان لەنێوان شارەكانی هەرێمی كوردستان نەدەدرا ئەمەش بۆ ئەوەی بەرهەمی هەر شارێك لەنێو خودی شارەكە ساغبێتەوە، ئەمە لە كاتێكدایە كە عێراق بە بیانووی ڕێگری لە بڵاوبوونەوەی نەخۆشی ڕێگە بە گواستنەوەی مریشكی زیندوو لە هەرێمی كوردستانەوە بۆ پارێزگاكانی عێراق نادات.

لێدوانی فەرمی: د. فیراس سدیق، بەڕێوەبەری سامانی ئاژەڵ لە وەزارەتی كشتوكاڵی هەرێمی كوردستان بە ئاڤا نیوزی ڕاگەیاند:

- لە ئەمڕۆوە ڕێگە بە گواستنەوەی بەرهەمە پەلەوەرییەكان لەنێوان شارەكانی هەرێمی كوردستان دەدرێت، ئەمەش ئەو گرفتە چارەسەر دەكات كە بە هۆی بڕیاری ڕاگرتنەكە دروست ببوو.

- عێراق ڕێگە بە گواستنەوە و ناردنی مریشكی زیندووی هەرێمی كوردستان نادات بۆ پارێزگاكانی تر، ئێستا ئێمە لەسەر هێڵین بۆ ئەوەی لە چەند ڕۆژی داهاتوو گرفتەكە چارەسەر بێت و عێراق ئەو ڕێگەیە بكاتەوە.

ئەوەی پێویستە بیزانیت: بەپێی داتاكانی وەزارەتی كشتوكاڵی هەرێمی كوردستان بەرهەمی ساڵانەی گۆشتی مریشك لە هەرێمی كوردستان نزیكەی 250 تۆنە، بەڵام پێویستیی ناوخۆ بۆ ئەم بەرهەمە 140 تاوەكو 150 تۆنە، بۆیە پێویستە ئەو بەرهەمەی لە ناوخۆ زیاد دەبێت هەناردەی پارێزگاكانی عێراق بكرێت، ڕێگریی عێراق لەمە زیانی گەورەی دارایی بە خاوەن كێڵگە پەلەوەرییەكان دەگەیێنێت.