بڕیارێك لە بەرژەوەندیی كرێكاران دەدرێت

ئاڤا نیوز

وەزارەتی كار و كاروباری كۆمەڵایەتیی حكومەتی هەرێمی كوردستان ڕێككاری توندی یاسایی لەبەرامبەر هەر خاوەن پڕۆژە و كارێك دەكات كە كرێكارەكانی دەستەبەر نەكردبێت، داواش دەكات هەر كرێكارێك لە كاتی كاركردن یان بەهۆی كارەكەیەوە تووشی ڕووداوێك بوو و زیانی پێگەیشت بە زووترین كات قەرەبوو بكرێتەوە.

بۆچی گرنگە: لە هەرێمی كوردستان دەیان كرێكار هەن لە كاتی كاركردن تووشی ڕووداو بوونە و بەهۆی دابیننەكردنی دەستەبەر لەلایەن خاوەنی پڕۆژەكانەوە هیچ قەرەبووییەك نەكراونەتەوە، بەڕێوەبەرایەتیی گشتیی كار و دەستەبەری كۆمەڵایەتیی مەبەستیەتی لەمەودوا لە هەر ڕووداوێكدا بە زووترین كات ئاگادار بكرێتەوە بۆ ئەوەی ڕێوشوێنی پێویست بگیرێتە بەر.

لێدوانی فەرمی: مەریوان بەگۆک عەزیز، بەڕێوەبەرى گشتى کار و دەستەبەرى کۆمەڵایەتى، بە ئاڤا میدیای ڕاگەیاند: بۆ ئەوەی مافی ئەو كرێكارانە نەفەوتێت كە لە كاتی كاركردن یان بە هۆی كاركردنەوە تووشی ڕووداوێك دەبن، زامدار دەبن یاخود گیان لەدەست دەدەن، نووسراوێكمان ئاراستەی هەریەك لە وەزارەتەكانی ناوخۆ و تەندروستی و ئەنجوومەنی دادوەری كردووە و داوامان كردووە لە هەر ڕووداو و حاڵەتێك وا بەڕێوەبەرایەتییەكانمان لە پارێزگا و ئیدارەكان ئاگادار بكەنەوە.

- نووسراوی بەڕیوەبەرایەتییەكە بۆ ئەوەیە ئەگەر ئەو كەسەی كە تووشی ڕووداوێک دەبێت كرێكار بێت و دەستەبەر كرابێت ئەوا یان قەرەبوو دەكرێتەوە بەپێی ڕێژەی برین و پێكانەكەی یانیش خانەنشین دەكرێت، هاوكات ئەگەر ڕووداوەكە بە مردن كۆتاییهات ئەوا میراتگرانی كرێكارەكە لە مووچەی خانەنشینییەكەی سوودمەند دەبن.

- ڕێككاری یاسایی توند لەبەرامبەر هەر خاوەن پڕۆژە و كارێك دەگیرێتە بەر ئەگەر ئەو كرێكارەی كە تووشی ڕووداوەكە بووە دەستەبەر نەكرابێت.

- پێویستە هەر خاوەن پڕۆژە و كارێك بە زووترین كات كرێكار و كارمەندەكانیان دەستەبەر بكەن.