نێچیرڤان بارزانی و ماکرۆن جەخت لە پاراستنى ئارامى و سه‌قامگيرى ناوچه‌كه‌ دەکەنەوە

ئاڤا نیوز
 
سەرۆكی هەرێمی كوردستان پەیوەندییەكی تەلەفۆنی لە سەرۆكی فەرەنساوە پێدەگات و تاوتوێی چەند پرسێكی گرنگی پەیوەست بە ناوخۆی هەرێمی كوردستان و عێراق و پێشهاتەكانی ناوچەكە دەكەن.

ڕاگەیێنراوی فەرمی: سەرۆكایەتیی هەرێمی كوردستان، ڕاگەیێنراوێكی بڵاوكردووەتەوە و تێیدا هاتووە، شەوی ڕابردوو، نێچیرڤان بارزانی، سەرۆكی هەرێمی كوردستان، پەیوەندییەكی تەلەفۆنی لە ئیمانوێل ماكرۆن، سەرۆكی فەرەنسا پێگەیشت، تێیدا په‌يوه‌ندييه‌كانى هه‌ولێر و به‌غدا، دۆخى عێراق و هه‌رێمى كوردستان، پێشهاته‌كانى سووريا و ڕۆژهه‌ڵاتى ناوه‌ڕاستیان تاوتوێ کرد.

باسی چی كراوە: نێچیرڤان بارزانی و ماكرۆن،

- جەختیان لە گرنگيى چڕكردنه‌وه‌ى هه‌وڵه‌كان بۆ پاراستنى ئارامى و سه‌قامگيرى ناوچه‌كه‌ كرده‌وه‌، هاوكات به‌رده‌واميى گفتوگۆگانى نێوان هەردوو حكومەتی هه‌رێمى كوردستان و حكوومه‌تى فيدراڵى عێراقیان بۆ چارەسەر‌كردنى كێشه‌كانى هه‌ولێر و به‌غدا به‌ گرنگ بۆ سه‌قامگيريى عێراق وەسف کرد.

- سەرۆکی فەرەنسا، جه‌ختى له‌ به‌رده‌واميى پشتگيريى وڵاتەكەی بۆ عێراق و قه‌واره‌ى ده‌ستووريى هه‌رێمى كوردستان كرده‌وه‌ و تيشكى خسته‌ سه‌ر ئه‌وه‌ى كه‌ فه‌ره‌نسا به‌ بايه‌خێكى زۆره‌وه‌ له‌ په‌يوه‌ندييه‌كانى له‌گه‌ڵ عێراق و هه‌رێمى كوردستان ده‌ڕوانێت.

- ماكرۆن پيرۆزبايى سه‌ركه‌وتنى هه‌ڵبژاردنى په‌رله‌مانى كوردستانى له‌ نێچيرڤان بارزانى كرد و تيشكيان خسته‌ سه‌ر هه‌وڵه‌كانى پێكهێنانى كابينه‌ى نوێى حكوومه‌تى هه‌رێمى كوردستان، هه‌روه‌ها هه‌ردوولا هاوڕا بوون له‌سه‌ر گرنگيى پاراستنى مافه‌كانى پێكهاته‌كان له‌ عێراق و سووريا و داكۆكییان له‌ پاراستنى مافه‌كانى كورد له‌ سووريا كردەوە.

- نێچيرڤان بارزانى، سوپاس و پێزانينى هه‌رێمى كوردستانى بۆ پشتگيرى و ڕۆڵى دۆستانه‌ى فه‌ره‌نسا و ماكرۆن له‌ يارمه‌تيدانى عێراق و هه‌رێمى كوردستان به‌تايبه‌تى له‌ ڕۆژگاره‌ سه‌خته‌كاندا دووپات كرده‌وه‌ كە گه‌لى كوردستان هه‌رگيز هاوكارييه‌كانى فه‌ره‌نسا له‌بير ناكات.