سبەی شاندی هەرێمی کوردستان و وەزارەتی دارایی عێراق جارێکی دیکە کۆدەبنەوە

ئاڤا نیوز

 

کۆبوونەوەی نێوان شاندی هەرێمی کوردستان لەگەڵ وەزیری دارایی عێراق کۆتاییهات، بڕیارە سبەی جارێکی دیکە لەگەڵ وەزارەتی دارایی عێراق کۆببنەوە.

 

وێنە گەورەکە: شەوی پێنجشەممە 30-1-2025، شاندێکی باڵای هەرێمی کوردستان، بۆ گفتوگۆکردن لەسەر پرسی مووچەی 12مانگی ساڵی 2025 و لیستی مووچەی خانەنشینان و مووچەی مانگی 12ی 2024 و هەناردەکردنەوە نەوتی هەرێمی کوردستان گەیشتنە بەغدا.

 

زانیاریی پەیامنێر: دەروون مەلاناجی پەیامنێری ئاڤا لە بەغدا، ڕایگەیاند: ڕۆژی شەممە 1-2-2025، شاندی هەرێمی کوردستان جارێکی دیکە لەگەڵ وەزارەتی دارایی عێراق کۆدەبێتەوە.

 

زانیاریی زیاتر: پاشنیوەڕۆی ئەمڕۆ هەینی، کۆبوونەوەی شاندی هەرێمی کوردستان لەگەڵ تەیف سامی وەزیری دارایی عێراق بەڕێوەچوو، دوای کۆتاییهاتنی کۆبوونەوەکەش ڕێباز حەملان، بریکاری وەزارەتی دارایی عێراق قسەی بۆ ڕۆژنامەنوسان کرد.

 

لێدوانی فەرمی: ڕێباز حەملان لە كۆنفڕانسێكی ڕۆژنامەوانیدا ڕایگەیاند:

- كۆبوونەوەكەی ئەمڕۆ ئەرێنی بوو و تەنیا باس لە دوو بابەت كرا ئەوانیش بریتی بوون لە مووچەی مانگی یەكی فەرمانبەرانی هەرێمی كوردستان و مووچە و پاداشتی خانەنشینان، جگە لەو دوو بابەتە باسی هیچ بابەتێكی دیكە نەكرا، مووچەی مانگی یەك دەكرێت بە بنەما بۆ تەواوی مانگەكانی ئەمساڵ.

 

- لە كۆبوونەوەكەدا هەندێك وردەكاری و تێبینی سەبارەت بە لیستی خانەنشینان هەبوو، حكومەتی عێراق خانەنشینیی فەرمانبەرانی هەرێمی كوردستان لە 1-1ی ئەمساڵەوە جێبەجێ دەكات بەڵام ئەوەی 1-7ی ساڵی ڕابردوو هەرێمی كوردستان كردوویەتی لەسەر داهاتی خۆی داویەتی و بەمشێوەیەش بەردەوام دەبێت، بە هۆی ئەو وردەكارییەوە بەشی دووەمی كۆبوونەوەكەی سبەی تەواو دەكرێـت.