کارکردن لە پڕۆژەی فریاگوزاری خێرای ئاوی هەولێر بەشێوەیەکی چڕ بەردەوامی هەیە

 

ئاڤا نیوز

 

کارکردن لە پڕۆژەی فریاگوزاری خێرای ئاوی هەولێر بەردەوامە، بە تەواوبوونیشی کێشەی ئاوی خواردنەوەی شاری هەولێر چارەسەر دەبێت و  هەزار بیری ئاویش دادەخرێت.

چیرۆکی سەرەکی: پڕۆژەی فریاگوزاری خێرای ئاوی هەولێر یەکێکە لە پڕۆژە ستراتیژیەکانی کابینەی نۆیەم، ئامانج لێی ئەوەیە تا 30 ساڵی تر شاری هەولێر کێشەی ئاوی خواردنەوەی نەمێنێت و بڕیارە بە تەواو بوونی هەزار بیری ئاوی خواردنەوە بە یەکجاری دابخرێن.

لێدوانی فەرمی: ڕابەر حسێن، بەڕێوەبەری ئاوی هەولێر بە ئاڤا میدیای وت، لە 75%ـی پڕۆژەکە تەواو بووە، لە چوار هێڵ پێکدێت، تا مانگی شەش دوو هێڵیان بەتەواوی کۆتایی دێت و دەکەوێتە کار.

ئەو دوو هێڵەی تەواو دەبێت بەمجۆرەیە:

هێڵی یەکەم- دەکەوێتە دەرەوەی شەقامی 120 مەتری کە هەریەکە لە گەڕەکەکانی، سێبیران، 32ـی پارک، سەرکارێز، مامزاوە، قەتەوی تا دەگاتە دارەتوو، بنەسڵاو و فەرمانبەران تاوەکو گەڕەکی 8ـی حەسارۆک دەگرێتەوە.

هێڵی دووەم - دەکەوێتە گەڕەکەکانی ناوەوەی هەولێر بە هەمان ئاراستەی هێڵی یەکەم، واتا  گەڕەکەکانی بەرامبەر هێڵی یەکەم دەگرێتەوە تا دەگاتە شەقامی کەرکووک.

ژمارەکان وادەڵێن: گوژمەی پڕۆژەکە 480 ملیۆن دۆلارە و لەلایەن کۆمپانیای هێمن گروپ جێبەجێ دەکرێت، لە پڕۆژەکە بە دووری 500 کیلۆمەتر بۆری بە قەبارەی جیاواز دادەنرێت.

ئەمەش بزانە: هێڵی سێ، دەکەوێتە عەنکاوە تا بەحرکەیە، هێڵێ چوارەمیش لە شەقامی بەحرکە تا شەقامی کۆیە دەبێت.